Qytetarët shqiptarë dhe kosovarë që do të duhet të hyjnë dhe dalin në mes të dy vendeve, nuk do të kenë më dy kontrolle në kufi.
Kjo pasi Ministria e Brendshme e Shqipërisë dhe ajo e Kosovës kanë vendosur që policitë kufitare të bashkëpunojnë, dhe kontrolli i qytetarëve të jetë vetëm njëherë, i përbashkët.
Ministri i Brendshëm Sandër Lleshaj shkruan në Twitter:
Ndryshime të rëndësishme në menaxhimin e kufirit me Kosovën. Kontrollet e dyfishta hiqen. Policitë e të dy vendeve do të kryejnë së bashku kontrollet sipas parimit një ndalesë një kontroll.
Qeveria miratoi dje vendimin për këtë ndryshim të rëndësishëm, që lehtëson ndjeshëm lëvizjen e lirë ndërmjet Shqipërisë dhe Kosovës.
Por lehtësimi i lëvizjes së lirë nuk mbaron me kaq. Së shpejti ndërmerren hapa shumë më të rëndësishëm, për të vendosur standarde plotësisht europiane në kufirin Shqipëri-Kosovë.