Avokati dhe politikani Spartak Ngjela ka sugjeruar se mazhoranca socialiste duhet të prodhojë një tjetër kryeministër, nëse dëshiron të mos humbasë pushtetin. Sipas tij, socialistët duhet të përsërisin shembullin e vitit 1999 kur ekzekutivin e lanë në dorë të Pandeli Majkos, ndërsa Fatos Nano drejtonte selinë rozë. “Shqipëria sot gjendet tamam si në vitin 1999, përpara se të fillonin bombardimet kundër Jugosllavisë; por edhe atëherë, që qeveria shqiptare të bashkohej me mendimin amerikan për bombardimet e Jugosllavisë, u desh të rrëzoheshin dy kryeministra rresht: Sali Berisha dhe Fatos Nano. Politika amerikanë e kishte provuar atëherë se, me këta dy kryeministra nuk mund të bëheshin bombardimet kundër Beogradit. Prandaj ajo i rrëzoi të dy”, u shpreh Ngjela. Sipas tij, deri tani, vetëm një kryeministër i është përgjigjur skemës amerikano- gjermane për ngritjen reale të shqiptarizimit në Ballkanin Perëndimor, si i vetmi aleat real amerikan në Ballkan – dhe ai ka qenë Pandeli Majko. “Ky ishte kryeministri shqiptar që iu dha udhë reale bombardimeve për çlirimin e Kosovës. Të tjerët, në forma të ndryshme, kanë shitur interesin kombëtar te fqinjët pushtues për të garantuar pushtetin e tyte; dhe, në fund, kanë rënë në korrupsion: kanë vjedhur mjetet monetare të shtetit shqiptar dhe kanë bllokuar zhvillimin; por të gjithë janë kryeministra-kunguj; që vetëm kanë vjedhë shqiptarët”, nënvizon Ngjela. Sipas tij, edhe Edi Rama është “e njëjta prerje me paraardhësit e tij, por, nëse do të vijojë kështu, duhet ndërruar”. Avokati i njohur kritikoi sjelljen e qeverisë shqiptare për varrezat greke, duke thënë se Rama “niset për Çamërinë dhe përfundon në fantazmogorinë pushtuese të Vorio-Epirit”. “Çdo politikë e re ka kohën e saj, ku ajo ose konsumohet, ose humbet. Shqiptarët duhet të nxitojnë se ky është një fat i madh historik për zhvillimin e tyre, por që ka afër tete vjet që po pengohet nga dy kryeministra fantazmë – Sali Berisha dhe Edi Rama. Tani që të dy janë futur në udhën e likuidimi të tyre, por që, duke parë marrëveshjen e fundit për varret e ushtarëve grekë, kuptojmë se ende po vijon në Shqipëri vallja makabër e Esat Toptanit”, shprehet Ngjela. Sipas tij, amerikanët duhet të veprojnë si në vitin 1999; kur gjetën Pandeli Majkon dhe e çuan skemën deri në çlirimin e Kosovës. “Edhe mazhoranca socialiste duhet ta ketë parasysh këtë, sepse nuk e ka pasur të lehtë që të jetë partnere me politikën amerikane, por, përderisa tani e ka arritur këtë, duhet të dijë të manovrojë brenda frymës që po kjo mazhorancë, me kryeministrin e vet, në vitin 1999, diti të ndihmojë realisht në çlirimin e Kosovës”, thotë Ngjela.