Rama: PD ka nevojë për një paketë shpëtimi, kjo fushata më e bukur

415
Kryeministri Edi Rama i ftuar në emisionin “Studio e hapur”, i cili kësaj here është realizuar në Himarë, ka theksuar se, qeveria shqiptare është e gatshme të diskutojë me Greqinë për çështjet e mbartura.
“Ne kemi qenë që në krye të herës të gatshëm që të diskutojmë për të gjitha çështjet e bartura dhe kemi adresuar nevojën për ta nisur që nga ligji i luftës që është një absurditet total dhe për ta çuar pastaj me radhë diskutimin në të gjitha çështjet e tjera. E nisëm këtë punë me qeverinë e kaluar, zgjidhëm çështjen e toponimeve që i rëndonte shumë shqiptarët, sidomos kur duhet të ktheheshin në Shqipëri dhe të kalonin kufirin dhe anasjelltas. Pastaj gjërat ndryshuan në Athinë dhe ne presim që qeveria e Athinës të jetë më e qetë, të zgjidhë problemin jetik që ka me kreditorët dhe pastaj të shikojmë mundësinë për të gjetur me qetësi zgjidhjet e duhura”, tha Rama.
Ndërsa për çështjen e detit Rama tha se, “nuk rezulton të ketë nisur konkretisht puna për kërkimin e naftës sepse do të ishte një shkelje e rëndë, e një kuadri gjërash. Jemi praktikisht para një situate shumë të brishtë, por padyshim për ne është një çështje e interesit kombëtar, e sovranitetit territorial të Shqipërisë dhe do diskutohet për të gjetur zgjidhjen më të mirë të mundshme dhe që në krye të herës ne kemi qenë të gatshëm të përfshijmë një palë të tretë të painteresuar drejtpërdrejt siç jemi ne dhe Greqia, dhe të bazuar në një ekspertizë të lartë ndërkombëtare”.
Duke folur për kandidatin e ASHE në Himarë, Rama u shpreh se Gjergj Goro e ka të sigurtë fitoren , ndërsa për PBDNJ theksoi se, “ata janë në garën e tyre kështu kanë qenë edhe herën e kaluar, siç janë pozicionuar herën e kaluar janë pozicionuar edhe këtë herë, siç humbën herën e kaluar, do humbasin edhe këtë herë”.
Duke folur për Partinë Demokratike, Rama u shpreh se, ajo po bën një fushatë sikur s’ka ndodhur asgjë ën 23 qershorin e 2013-ës. Rama u shpreh se, Basha gënjen kur thotë se qeveria bllokon projektet. PD ka nevojë për një paketë shpëtimi dhe pjesë e saj është edhe kryetari i saj”.
“Ne e kemi asistuar Bashkinë e Tiranës më shumë se një herë për ti mësuar se si duhen përpunuar dokumentacioni dhe shkresat përkatëse për buxhetin afatmesëm apo për të zhbllokuar financimet bazuar mbi pushtetin e aprovuar. Në më shumë se një rast i kemi dhënë asistencë teknike”, tha Rama.
Lidhur me projektin për bulevardin, për tramin, Rama tha se, “Shqipëria e humbi të drejtën për të firmosur garancinë sovrane përpara se sa të vinim ne në qeveri për shkak të daljes nga binarët të financave publike dhe të akumulimit të një borxhi që si jepte më mundësi Shqipërisë të merrte borxh, se nuk jepte njeri borxh. U desh ardhja jonë dhe u desh ndryshimi i plotë i pozicionit në raport me financat publike për të rifituar besimin e institucioneve financiare”.
Lidhur me fushtën, Rama u shpreh se “për mua ka qenë fushata më e bukur që kam pasur fatin dhe privilegjin të marr pjesë, pasi si asnjëherë më parë ka pasur një prani të jashtëzakonshme grash dhe vajzash dhe besoj që ky është një moment për të mbajtur shënim, pasi në 21 qershor Shqipëria do votojë edhe për një vendimmarrje historike që iu ka hapur rrugën grave dhe vajzave për të qenë 50% në këshillat e rinj të bashkive”.
Duke folur për eksodin dhe azilkërkuesit Rama u shpreh se, “eksodin nuk e sollëm ne, ashtu siç varfërinë nuke sollëm ne, por po përpiqemi që ta luftojmë çdo ditë”.
Sigal