Rama: Jemi gati, 48 orët e fundit vendosa ta lë Bashën të qetë

421
Kryeministri Edi Rama ka vendosur të mos dalë këtë të diel në komunikimin javor. Rama e kishte kthyer në rutinë prej kohësh komunikimin e javës me qytetarët, të cilin e realizonte çdo të diel.
Por, sot ai e ka zëvendësuar komunikimin me atë, që kryeministri e quan “Shënimi i ditës”, një shkrim të shkurtër ku shpreh entuziazmin për skuadrën e re të Partisë Socialiste me shpalljen e listave të deputetëve, ndërsa i bën thirrje Lulzim Bashës të “marrë kthesën e shpëtimit”.
Rama thotë se 48 orët e ardhshme janë vendimtare, pasi është afati i fundit i PD-së për të vendosur nëse “do marrë kthesën e shpëtimit apo do të tretet në humnerën e vetëshkatërrimit.”
Shkrimi i plotë:
SHËNIMI I DITËS (në vend të Komunikimit të Javës)
“Mbrëmë kemi regjistruar skuadrën e re përfaqësuese të Partisë Socialiste. Jemi plotësisht gati të nisim finalen e madhe të këtij mandati dhe hapim një kapitull të ri për Shqipërinë që duam. Me forca të ripërtërira. Me më shumë eksperiencë. Më shumë gjak të ri. Me vendosmëri ende më të madhe se katër vjet më parë.
Por ndryshe nga katër vjet më parë, kemi përballë jo një qeveri të diskredituar, po një opozitë të konsumuar. Të njëjtët njerëz që e çuan Shqipërinë në rrugën e rrënimit, po e çojnë Partinë Demokratike në rrugën e asgjesimit.
Unë vazhdoj ta kem thuajse bindje se Partia Demokratike do të ndalet mu në buzë të humnerës dhe do të kthehet për të hyrë në zgjedhje. Kudo ku ka marrë një gjë në dorë, Lulëzim Basha ka bërë një dëm të madh dhe kjo është e vetmja arsye që ma bën bindjen të paplotë.
Sot do të doja ta shpjegoja këtë gjatë Komunikimit Javor, por vendosa të mos e bëj. Dua ta lë Lulëzim Bashën të qetë në këto 48 orë të fundit, të cilat vendosin nëse Partia Demokratike do të marrë kthesën e shpëtimit apo do të tretet në humnerën e vetëshkatërrimit.
Mbetem natyrisht i gatshëm ta pres kryetarin e PD-së në çdo moment, për të negociuar rikthimin e partisë së tij në fushën e betejës demokratike të 18 qershorit. Përndryshe Partia Demokratike kështu siç e njohim, do të jetë më shpejt se vonë një kujtim i së kaluarës.”
Sigal