Petraq BARJAMI

Parlamenti e votoi ligjin për prishjen e Teatrit Kombëtar dhe ndërtimin e kullave nga kompania “FUSHA Sh.p.k.”, mirëpo kundërshtimet vazhdojnë. Artistët dhe shoqatat civile do të organizojnë më 12 korrik protestë të fuqishme para kryeministrisë. Ndërsa beteja do të vazhdojë edhe me ankimime në Gjykatën Kushtetuese, edhe pse deri tani kjo gjykatë nuk funksionin, për shkak të mungesës së anëtarëve. Ndërkohë, Partia Demokratike i kërkon Bashkimit Evropian të ndërhyjë për tërheqjen e ligjit të Teatrit pasi sipas demokratit Genc Pollo bie në kundërshtim me Marrëveshjen e Stabilizim Asociimit

“Ne jemi Teatri, bashkohuni! Marshim drejt Kryeministrisë dhe Presidencës më 12 korrik! ”

Aleanca për Mbrojtjen e Teatrit ka bërë thirrje për një marshim proteste në mbrojtje të Teatrit ditën e enjte, më 12 korrik 2018! Marshimi do të zhvillohet përpara Kryeministrisë dhe Presidencës dhe do të përfundojë para teatrit Kombëtar. Në thirrjen e Aleancës thuhet: “Prej 5 muajsh, mijëra qytetarë kanë ngritur zërin kundër shembjes së Teatrit Kombëtar. Mijëra qytetarë i janë bashkuar protestave të përditshme kundër vjedhjes së pronës publike në favor të një firme ndërtimi dhe shndërrimit të historisë në një shesh ndërtimi. Dhjetëra mijëra janë bashkuar online dhe kanë ngritur zërin nëpërmjet peticioneve dhe rrjeteve sociale kundër të pangopurve. Qindra artistë kanë kundërshtuar shkatërrimin e trashëgimisë historike dhe shpirtërore. Qindra arkitektë kanë kundërshtuar atë që ata e quajnë një projekt të turpshëm dhe simbol të babëzisë. Qindra intelektualë kanë ngritur zërin kundër këtij akti, i cili nuk rrezikon thjesht godinat dhe pronën publike por sistemin demokratik në tërësi. E megjithatë Parlamenti, ditën e enjte, vendosi të injorojë zërat e shqiptarëve dhe të miratojë një ligj të posaçëm, i cili ia merr tokën publike Teatrit dhe ia jep kompanisë “Fusha sh.p,k,” për të ndërtuar kulla, ia merr Teatrin Kombëtar shqiptarëve, me gjithë vlerat historike dhe arkitektonike të tij, për të përmbushur nevojat financiare të një grushti të vogël personash. Parlamenti vendosi të injorojë shumicën e shqiptarëve dhe të dëgjojë vetëm një njeri. Kjo nuk është demokraci! Kjo është diktaturë! Ditën e enjte, bashkohemi në orën 18:30 te sheshi i Teatrit për të marshuar më pas drejt Kryeministrisë dhe Presidencës, së bashku me qindra artistë, intelektualë dhe aktivistë, për t’i treguar grushtit të vogël të njerëzve me pushtet se në Shqipëri ka ende njerëz të lirë. Për t’i kërkuar Kryeministrit të tërhiqet dhe Presidentit të kthejë mbrapsh ligjin e turpshëm të miratuar ditën e enjte nga Parlamenti. Ne jemi njerëz të lirë! Ne jemi Teatri!