Sa herë ndërrohet pushteti largohen drejtorët e policisë dhe vijnë emra të rinj. Sa herë që ndërrohet ministri, largohen përsëri një pjesë e drejtorëve dhe emërohen persona të tjerë në Polici. Ky është fenomeni që është vërejtur në 20 vitet e fundit në Policinë e Shtetit. Por duket se ministri i Brendshëm Sandër Lleshaj nuk u beson drejtuesve aktualë të Policisë, duke rikthyer në postet kyçe, ish-drejtorët që janë shkarkuar ose transferuar nga Saimir Tahiri.
Ish-drejtori i Policisë Tiranë Tonin Vocaj pak ditë më parë u emërua Drejtori i Policisë Kriminale me urdhër të Sandër Lleshajt. Edhe Muhamet Rrumbullaku është emëruar Drejtor i SHÇBA-së. Të dy janë larguar nga postet drejtuese menjëherë sapo pushtetin e mori Partia Socialiste në vitin 2013 dhe në krye të Ministrisë së Brendshme u vendos Saimir Tahiri.
Emrat e tjerë që mendohet se do rikthehen në poste drejtuese në Polici janë Edmond Rizaj, i cili ka qenë ish-drejtor i Krimit të Organizuar, Ilia Nase, ish-kreu i Rendit në Drejtorinë e Përgjithshme dhe Arben Caka ish-shef Komisariati në Tiranë. Ish-drejtori i Policisë së Shtetit Aleks Hajdari, e quan lëvizje të duhur rikthimin në poste kyçe të ish-drejtuesve, por i kërkon Sandër Lleshajt që të shfuqizojë ligjin.
“Lëvizjet e fundit janë për t’u përshëndetur. Tonin Vocaj dhe Muhamet Rrumbullaku janë profesionistë. Por sot Sandër Lleshaj duhet që të shfuqizojë ligjin që ndalon rikthimin në Polici, për të gjithë ata njerëz që kanë më shumë se 2 vite që janë larguar nga radhët e uniformave blu. Ish drejtuesit janë profesionistë të trajnuar dhe që kanë hetuar krimin. Duhet të rikthehen patjetër në Polici”, – shprehet Aleks Hajdari në një prononcim për Gazetën MAPO.
Veli Haklaj, ish-drejtor i Analizës së Informacionit Kriminal në Polici mendon se lëvizjet e Sandër Lleshajt janë me karakter politik. “Janë lëvizje me ndikim politik. Lleshaj shikon vetëm aspektin politik dhe nuk e njeh Policinë e Shtetit. Në vlerësimin tim është vlerësuar ana profesionale, por gjithsesi janë lëvizje politike. Lleshaj duhet të shfuqizojë ligjin që parashikon mosrikthimin në Polici për ata që kanë më shumë se 2 vite që nuk janë më në Polici. Ai ligj ndalon rikthim në Polici të atyre që kanë qenë profesionistë”, – shprehet Veli Haklaj.
Rikthimet e ish-drejtorëve
Burime nga Policia e Shtetit thanë se emrat e ish-drejtorëve para vitit 2013 po rikthehen në Polici me urdhër të ministrit të Brendshëm Sandër Lleshaj. Për gazetarin dhe autorin e “Abc Story” Ferdinand Dervishi, kemi të bëjmë me një fenomen ndryshe dhe sipas tij po rikthehen në polici njerëz me integritet personal.
“Zakonisht kemi parë një fenomen që sa herë vjen në pushtet një parti, largon drejtorët që kanë qenë. Vinte në pushtet PD-ja pastronte gjithë drejtorët e PS-së, ose e kundërta. Edhe në 2013 u reflektua ky problem. Por tani shohim që një ministër bën një lëvizje që s’ka ndodhur kurrë. Kthimi në disa pozicione kyçe i disa drejtorëve që kanë emër pozitiv. Emrat që po rikthehen kanë integritet personal, pra që do të thotë, mbeten te roli i specialistit edhe kur është partia në mes”, – thotë Ferdinand Dervishi.
U trajnuam e specializuam dhe normalisht meritonim të ishin pjesë e policisë dhe jo të kërkojmë punë për të marrë një rrogë në mënyrë që të mbajmë familjen, shprehet ish-drejtori i Policisë Elbasan Ismail Elezi.
“Rikthimi ka një ngërç. Lleshaj mund të ketë dëshirë t’i kthejë ish-drejtuesit, sepse Policia ka nevojë për profesionistë, por ministri i Brendshëm nuk e njeh Policinë e Shtetit. Më parë duhet të rrëzohet ligji që të kthehen në Polici ata që janë larguar për më shumë se dy vite nga Policia. Ne, ish-drejtorë të Policisë, të trajnuar dhe specializuar kemi përfunduar në kushtet ku të marrim një rrogë dhe duhet të ishim në Polici. U larguam padrejtësisht. Mua më dhimbset Policia në këto kushte që është katandisur”,-tha Ismail Elezi. Për rikthimin e ish-drejtorëve në Polici, Ferdinand Dervishi thotë se duhet edhe mbështetje politike, jo vetëm përgatitja profesionale e tyre.
“Do të ishte shumë mirë që të futej dhe mbetej si frymë kjo lëvizje, pasi nuk do kemi më që sa herë ndërrohet pushteti, ikin dhe drejtuesit e Policisë. Por njerëzit që po rikthehen nuk duhet të jenë në pozicionet e tyre të trembur nga politika, të frikësuar dhe të lënë në cep pa mbështetje. U duhet dhënë dhe ajo që quhet “mbështetje politike”, pra t’u jepet mbështetje nga pushteti aktual. Nëse ish-drejtuesve që po rikthehen u jepet pushteti i kufizuar, atëherë nuk do kemi rezultate të mira”, – thekson Ferdinand Dervishi. Në muajt e ardhshëm Policia e Shtetit pritet të përfshihet nga ndryshime duke filluar nga Drejtorët Rajonalë, deri te shefat e krimeve.
U rikthyen në poste kyçe
Tonin Vocaj Drejtor i Policisë Kriminale
Muhamet Rrumbullaku Drejtor i SHÇBA
Emrat që mund të rikthehen
Edmond Rizaj ish-drejtor i Krimit të Organizuar
Ilia Nasi ish-kreu i Rendit në Drejtorinë e Përgjithshme
Arben Caka ish-shef Komisariati në Tiranë
Hamdi Fiore ish-drejtor i Policisë Tiranë
Arjan Muça ish-drejtues në Polici
