Këshilli Ekzekutiv i Konferencës Gjyqësore reagoi dje në lidhje me përplasjet e fundit mes Ministrisë së Drejtësisë dhe KLD-së lidhur me funksionimin e Këshillit të Lartë të Drejtësisë. Në një deklaratë për mediat thuhet se: “Këshilli shpreh shqetësimin e të gjithë gjyqtarëve të të gjitha niveleve, në lidhje me disa deklarata e qëndrime publike të ditëve të fundit, të cilat i drejtohen në masë e pa dallim të gjithë gjyqtarëve”.
1. Këshilli Ekzekutiv i Konferencës Gjyqësore, si organi përfaqësues i Konferencës Gjyqësore Kombëtare është i ndërgjegjshëm për sfidat dhe detyrat që shtrohen përpara pushtetit gjyqësor. Ato përcaktohen qartë edhe në Progres Raportet e BE si prioritetet të punës sonë të përditshme. Në këtë kuadër, është mëse urgjente të angazhohemi për forcimin e pavarësisë së pushtetit gjyqësor, për rritjen e efektivitetit, përgjegjësisë dhe llogaridhënies si dhe luftës pa kompromis kundër korrupsionit.
2. Për arritjen e objektivave të mësipërme, pushteti legjislativ dhe ekzekutiv kanë në dorë mjetet e nevojshme kushtetuese dhe ligjore për reformimin e mëtejshme të pushtetit gjyqësor. Por, në këtë proces është e nevojshme bashkëpunimi me të gjithë operatorët e sistemit të drejtësisë. Pushteti gjyqësor mbështet këto nisma, mbështet reformimin dhe shpreh gatishmërinë të kontribuojë në këtë proces të rëndësishëm dhe jetik për vendin.
3. Këshilli Ekzekutiv i Konferencës Gjyqësore shpreh shqetësimin e të gjithë gjyqtarëve të të gjitha niveleve, në lidhje me disa deklarata e qëndrime publike të ditëve të fundit të cilat i drejtohen në masë e pa dallim të gjithë gjyqtarëve. Deklarata të tilla vetëm sa e përkeqësojnë imazhin e gjyqësorit dhe përbaltin misionin e punën e përditshme të gjyqtarëve. Nuk duhet harruar se shumica e gjyqtarëve në ushtrim të funksionit të tyre janë të përgjegjshëm e punojnë me përkushtim e integritet, duke përballuar tensionet e një pune delikate e voluminoze, pavarësisht se përballë tyre janë çdo ditë njerëz që kanë probleme me ligjin, persona me rrezikshmëri të lartë shoqërore, palë në konflikte civile me njëri – tjetrin, shtetin, etj.
4. Etiketimi i masës së përgjithshme të gjyqtarëve dhe identifikimi i tyre në tërësi me fenomenet negative e vështirëson punën e çdo gjyqtari, cenon pavarësinë e pushtetit gjyqësor dhe dëmton misionin e dhënies së drejtësisë.
5. Këshilli Ekzekutiv i Konferencës Gjyqësore, distancohet qartësisht dhe dënon me forcë çdo shfaqje korruptive në sistemin e drejtësisë. Ai i bën apel institucioneve dhe organeve shtetërorë të të gjitha pushteteve, medias e opinionit publik që të kontribuoje për të luftuar pa kompromis këtë fenomen të shëmtuar që cenon rëndë interesat e shtetit dhe të qytetarëve. Kjo luftë kërkon masa e veprime konkrete, ndaj personave e individëve përgjegjës, duke respektuar Kushtetutën dhe ligjin, pa bërë përgjithshme denigruese.
6. Nga sa më sipër, Këshilli Ekzekutiv i Konferencës Gjyqësore, mori në konsideratë edhe mundësinë e thirrjes në të ardhmen të Konferencës Gjyqësore Kombëtare.
