TIRANE – Shpëtim Idrizi dhe 4 deputetët e PDIU-së në Kuvend, braktisin koalicionin e djathtë dhe i bashkohen mazhorancës. Marrëveshja u finalizua këtë të hënë nga kryeministri Edi Rama, njëherësh kreu i Partisë Socialiste dhe kryetari i Partisë për Drejtësi, Integrim dhe Unitet Shpëtim Idrizi. Bashkëpunimi i parë konkret mes palëve do të jenë zgjedhjet vendore të 21 Qershorit ku PS-LSI dhe PDIU do të dalin me 61 kandidatë të përbashkët për bashkitë.
Pas gjysmë ore takim në Selinë e Partisë Socialiste kreu i qeverisë Rama dhe Idrizi ku zyrtarizuan bashkëqeverisjen mes tyre. Kryesocialisti Rama tha se nuk bëhet fjalë për ndarje kandidatësh mes partish, por për bashkimin e të gjitha partive të koalicionit në mbështetje të kandidatëve në çdo bashki.
“Nuk kemi të bëjmë më kalim majtas apo djathtas, por me rritjen e forcës politike të këtij vendi për të ecur drejt, më tutje në rrugën pa kthim të një rilindje, ku të gjitha forcat, përjashto PD mund të japin kontributin e tyre duke ruajtur identitetin e tyre, zërin e tyre, duke pasuruar kompleksitetin e një koalicioni që bazuar në të gjitha anketimet tona konsiderohet nga një shumicë dërrmuese se po ecën në drejtimin e duhur”, u shpreh Rama.
Ndërsa kreu i PDIU-së nga ana tjetër e quajti fillesë të këtij bashkëpunimi votën që PDIU dha pro për reformën administrativo-territoriale. Idrizi tha se me këtë marrëveshje PDIU synon të rrisë peshën politike.
Rama: Zgjedhjet vendore stacioni i parë i bashkeqeverisjes, dalim me kandidate te përbashkët
Kryeministri Edi Rama tha se marrëveshja me PDIU-në është për bashkëqeverisje, çka do të thotë se në këtë mënyrë PDIU largohet përfundimisht nga koalicioni i djathtë. Duke iu referuar zgjedhjeve vendore të 21 Qershorit si bashkëpunimi i parë konkret mes PS-së dhe PDIU-së, shefi i mazhorancës tha se projekti i mazhorancës është për të dalë me kandidatë të përbashkët në 61 bashkitë në vend, duke kaluar në plan të dytë ndarjen e bashkive sipas partive.
“Finalizuam marrëveshjen për të ecur në rrugën e partneritetit politik me PDIU, e drejtuar nga Iidrizi. Diskutimi është përqendruar në radhë të parë tek vija kryesore e këtij partneriteti politik çka do të thotë se së bashku me PDIU ne do të jemi në bashkëqeverisje dhe natyrshëm kemi diskutuar edhe për stacionin e parë të këtij rrugëtimi që është stacioni i zgjedhjeve vendore të 21 qershorit ku do të dalim së bashku me 61 kandidatë të koalicionit qeverisës, dhe më konkretisht do të shkëmbejmë opinionet dhe vendosim për këto kandidatura me një vëmendje të veçantë ndaj opinionit të PDIU në disa qarqe ku edhe influenca politike e kësaj partie është më e qenësishme sesa në qarqe të tjera ku sidoqoftë konsiderojmë PDIU një partner mjaft të rëndësishëm. Emra konkretë njësish nuk kemi, kemi vendosur ta ndërtojmë këtë partneritet duke u bazuar tek domosdoshmëria që të gjithë kandidatët të jenë të miratuar së bashku dhe në rastin konkret të PDIU, që në disa prej qarqeve të kemi edhe kontributin e drejtpërdrejtë të PDIU”, u shpreh Rama.
Rama: Nuk bejme ndarje sinoresh
“Dua të sqaroj që gabimisht por edhe për shkak të mënyrës si është proceduar në të shkuarën, ju raportoni (duke iu drejtuar gazetarëve) se ju dhanë 15 bashki LSI, ndërkohë që ne nuk kemi bërë dhe nuk do të bëjmë ndarje bashkish mes partive, por do të bashkojmë të gjitha partitë e koalicionit në mbështetjen të çdo kandidati në çdo njërën nga bashkitë. E drejta për të propozuar nuk është një ndarje sinoresh. Thirrja jonë për qytetarët do të jetë të votojnë kandidatin tonë, të përbashkët të koalicionit tonë. Kandidatët do të marrin përsipër të çojnë para punën e koalicionit tonë në nivel vendor, të çojnë para programin, të përfaqësojnë interesat e qytetarëve në nivel vendor. Do vazhdojmë të ndajmë përgjegjësi së bashku. Besojmë tek bashkimi i kontributeve”, theksoi Rama.
“Të gjejmë pikat e bashkëpunimit që mbështen në dy pika kryesore, në radhë të parë janë parimore, dhe si parti politike me peshë specifike po kërkojmë dhe të gjejmë mbështetjen më të mirë për të rritur peshën e PDIU. Fillimi i bashkëpunimit tonë ka qenë për një reformë të rëndësishme, për t’i dhënë pushtetit lokal një rëndësi të madhe. Kemi marrë pjesë në këtë reformë, kemi dhënë dhe piketat tona. Kemi rënë dakord të dalim me 61 kandidatë të përbashkët, dhe atje ku kemi zonat tona do propozojmë dhe kandidatët. Ne mbështesim që të paktën për politikën e jashtme të Shqipërisë e cila ka qenë dinjitoze, gjatë qëndrimit të zotit Rama në Serbi apo dhe me kërkesat e tjera në lidhje me Greqinë. PDIU do bëjë një presion pozitiv për marrëdhëniet mes Kosovës dhe Shqipërisë”, u shpreh Idrizi.
Shpetim Idrizi kish lënë të hapur mundësinë për koalicion me cilëndo parti nëse i ofron 5 bashki në Shqipërinë e Jugut dhe të Mesmen (Konispoli në Qarkun e Vlorës, Patosi në Fier, Rrogozhina në Tiranë, Shijaku në Qarkun e Durrësit dhe Peqini në Elbasan). PDIU prej kohësh kishte dhënë sinjale afrimi me të majtën dhe zërat për rreshtim me frontin e majtë në zgjedhjet më të afërta u shtuan së tepërmi edhe për shkak të një ftohjeje me opozitën.
