Nënkryetarja e LSI-së, Erisa Xhixho: Më 30 qershor do i frenojmë zgjedhjet me çdo formë

174

Nga studio e Report Tv, nënkryetarja e LSI-së, Erisa Xhixho, e pyetur se çfarë do të ndodhë në votimet e 30 qershorit u shpreh se kjo do të jetë një ditë krejtësisht normale, si gjithë të tjera, ku vetëm zgjedhje s’do ketë.

Xhixho ka cilësuar si emergjencë kombëtare, dorëheqjen e kryeministrit Edi Rama, që ka kapur të gjitha pushtetet në vend dhe po synon që të bëjë zgjedhje moniste.

Nënkryetarja e LSI-së ka risjellë sërish përgjimet e publikuara nga “Bild”.

“Disa mund të shkojnë në plazh, një ditë normale, për sa kohë që kemi një dekret të ri nga Meta. Është i detyrueshëm nga të gjithë. Kolegji zgjedhor nuk e ka bërë nul dekretin e Metës, e bën vetëm Gjykata Kushtetuese”, tha Xhixho.

Xhixho u shpreh e bindur se në 30 qershor nuk do të ketë zgjedhje.

“Do ta frenojmë në të gjitha format, protestat kanë qenë madhështore. Nuk është më çështje e opozitës, por kombëtare. Gjithë mekanizmat demokratik do të përdoren për ta frenuar në të gjitha format zhvillimin e zgjedhjeve, në zbatim për të zbatuar dekretin e presidentit Meta. Nuk flitet për datë zgjedhjeje, por si do shkojmë nga këto zgjedhje”, tha  Xhixho.