Bulqiza lëngon nga varfëria, papunësia, mungesa e infrastrukturës, mungesa e shërbimit shëndetësor, me një arsim të shkatërruar dhe mungesë të qetësisë e sigurisë publike
Kandidati për Kryetar i Bashkisë së Bulqizës, i propozuar nga PS-ja, Myfit Duriçi është një biznesmen i suksesshëm, me arsimim juridik, me master për punët sociale. Në intervistën për “Telegraf”, zoti Duriçi pohon se ndjenja e përgjegjësisë dhe obligimi që ndjen për bashkëqytetarët e vet, dashuria e vendlindjes, e shtyn që të jetë kandidat për Kryetar i Bashkisë, për të bërë gjithçka që Bulqiza të rilindë për të mirën e banorëve të saj.
– Zoti Duriçi, përse kërkoni që të jeni Kryetar i Bashkisë në Bulqizë?
– Ashtu siç më njohin qytetarët e Bulqizës, unë personalisht vij nga bota e biznesit, problemet e mia familjare e personale i kam të rregulluara, por më dhimbset seriozisht qyteti im, vendi ku unë kam lindur e jam rritur. Bulqiza, fatkeqësisht, edhe pas 23 vitesh, demokraci renditet si një ndër qytetet më të varfra të Shqipërisë, këtë gjendje unë dua ta ndryshoj dhe kjo nuk është e pamundur, vetëm se në këto vite ka munguar vullneti dhe dëshira e atyre që e kanë qeverisur për ta bërë një gjë të tillë.
– Përse duhet që banorët e Bashkisë Bulqizë t’ju japin votëbesimin?
– Ashtu siç ju përgjigja edhe në fillim, tek unë ekziston vullneti, dëshira për t’ja ndërruar faqen Bulqizës, këtë dëshirë timen ma njohin qytetaret e mi dhe besoj se kjo do të jetë edhe arsyeja kryesore që qytetarët e Bulqizës të votojnë kandidaturën time për Kryetar të Bashkisë Bulqizë.
Çfarë më tepër kanë premtimet tuaja, në krahasim me kandidatët e tjerë?
– Përpara disa viteve ish Kryetari i Bashkisë, që sot është larguar dhe garon për deputet si përfaqësues i Bulqizës për PD-së, pati dalë me sloganin se: “Unë do ta shëroj qytetin tim”, nisur kjo edhe nga profesioni i tij si mjek. Por ai, si kryetar i kësaj bashkie, megjithëse kane kaluar gjithë ato vite në qeverisjen e këtij qyteti, jo vetëm që nuk e shëroi këtë, por përkundrazi, qyteti është sot edhe më i varfër se kur ai u ngjit në karrigen e Kryetarit të Bashkisë. Qyteti lëngon nga varfëria, papunësia, mungesa e infrastrukturës, mungesa e shërbimit shëndetësor, me një arsim të shkatërruar dhe mungesë të qetësisë e sigurisë publike. Të gjitha këto janë të përfshira për t’ju dhënë zgjidhje në platformën time elektorale, të cilën ia kam prezantuar dhe e kam bërë të njohur qytetarëve të mi dhe ku u kërkoj sot votën, për t’i bërë realitet ato. Përsa i përket kandidatit të krahut tjetër politik, të PD-së, deri tani nuk jam njohur me premtimet e tij, që të bëj krahasimin, por një gjë ju them. Partia Demokratike e ka humbur moralin me qytetarët e Bulqizës, pasi ata kanë 20 vjet që e votojnë këtë parti dhe përfaqësuesit e saj dhe ajo ka 20 vjet që tallet me to. Shpresoj që ky do jetë viti i Rilindjes edhe për ta, duke votuar Partinë Socialiste dhe kandidaturën time si përfaqësues i saj.
– Si ka mundësi që banorët e qytetit e të fshatrave përreth të kenë një nivel jetese shumë të ulët, ndërkohë që Bulqiza, është me pasuri të mëdha nëntokësore?
– Natyrisht që konstatimi juaj është shumë i drejtë dhe këtë nuk e bëni vetëm ju, por e bëjnë edhe të huajt, që vijnë shpesh dhe vizitojnë Bulqizën. Përgjigja është e thjeshtë. Kjo vjen nga keqmenaxhimi i kësaj pasurie, abuzimi me të. Ju e dini mirë se me ligj nga qeveria shqiptare renta minerare e kromit duhet që t’i kalojë pushtetit lokal për tu investuar, por kjo edhe për rastet kur ka ndodhur, me këto fonde është abuzuar dhe realiteti është ky që ju konstatoni ne pyetjen tuaj.
– Si e shpjegoni ju që, ndonëse Bulqiza ka shumë miniera, papunësia është e madhe?
– Bulqiza quhet ndryshe edhe qyteti i minatorëve kjo është e vërtetë, pasi baza ekonomike e ndërtimit zhvillimit dhe ekzistencës së tij ka qenë dhe është miniera e kromit. Papunësia është e madhe për arsye se në miniere sot duhet të punonin tre apo katërfishi i punëtorëve që aktualisht punojnë. Kjo për faktin se në këtë minierë nuk ka patur asnjëherë një plan serioz për hapjen e fronteve të reja të punës (pusi i thellësisë) dhe nuk është investuar, por vetëm është abuzuar. Madje, kështu siç po veprohet deri më tani, nga mungesa e këtyre investimeve, miniera mund të mbyllet dhe qyteti të zhytet në një varfëri me pasoja të mëdha për të.
– A është ndihmuar Bulqiza me investime që duhet të kryhen në këto vite të qeverisjes Berisha?
– Me letra dhe fjalë, shumë para na serviren se janë hedhur për Bulqizën, por qytetarët nuk shohin asgjë me sy, se ku kanë shkuar këto para. Kjo do të jetë ndoshta edhe një ndër arsyet pse këta qytetarë do të më votojnë, pasi i kam siguruar se që ditën e parë të qenies time, si kryetar i kësaj Bashkie, do bëj transparent çdo lek që është hedhë kot dhe është abuzuar, duke vënë para përgjegjësisë ligjore e penale personat që kanë abuzuar në këto vite