Mirënjohje Metës për frenimin e projektit anti-kombëtar

531
Sigal

Shqiptarët duhet të shprehin mirënjohjen për Presidentin Ilir Meta, i cili tregoi cilësitë dhe vlerat e një shtetari dinjitoz e të përgjegjshëm, duke ndaluar një “kamikaz politik” të dëmtojë çështjen shqiptare.

Kryeministri Rama akoma nuk kupton që shteti dhe qeverisja kanë dallime

Zoti Rama! Kush jeni ju që përcaktoni shkallën e inteligjencës së përfaqësuesve të institucioneve më të rëndësishme Shqiptare, cila është njësia matëse që përdorni, apo niseni nga tallavaja juaj politike!!! Ky Kryeministër dhe bashkëpunëtorët e tij, akoma nuk kuptojnë se Shteti dhe Qeverisja kanë dallime; Shteti presupozon të pasqyrojë interesat e përhershme të shoqërisë, veçanërisht sigurinë kombëtare, ndërsa qeveritë ndikohen nga përkrahësit, simpatizantët dhe parapëlqimet e ndërsjella. Mënyra më e mirë për të siguruar pushtetin sipas “Rilindjes”, është ajo e shkatërrimit të plotë të sovranitetit të Shqipërisë dhe shqiptarëve. Kjo qeverisje vetëm mbllaçitet çdo ditë pa pushim pa menduar asgjë, pa u interesuar, pa kujtesë, pa dinjitet, vetëm të mashtroj dhe qëndroj në pushtet dhe të plaçkitë çfarë të mundet, duke e dhënë Shqipërinë dhe shqiptarët me PPP. Kryeministri shqiptar vazhdon mediokritetin e tij duke qeverisur si sundimtar. Ai vazhdon të propagandojë se “unë bëj shtet dhe unë përfaqësoj popullin!”, duke thënë një gënjeshtër të madhe që edhe ai sot nuk e beson vetë këtë dhe jo më bashkëpunëtorët apo populli! Para se të bëhej kryeministër ishte plot me “ëndrra për popullin”, më pas është plotë me “ëndrra” për të mos e humbur këtë pozitë dhe në këto moment nuk ka asgjë që ai nuk do të jetë në gjendje të bëj, për ta ruajtur pozitën e “sulltanit!”.

Ja cilat ligje ka shkelur DSIK për Certifikatën e Sigurisë të Cakajt

Dje, duke iu referuar Dokumentit të Presidentit të Republikës, Z. Ilir Meta rezulton se dhënia e Certifikatës së Sigurisë nga ana e DSIK-së brenda 24-orëve, ka shkelur rëndë sigurinë Kombëtare, por ka cenuar rëndë dhe interesat e Shqipërisë në NATO. DSIK-ja me dashje, apo e imponuar nga eprorët e saj, ka kryer shkelje të rënda ligjore dhe proceduriale të:

– Ligjit Nr. 8457, Dt.11.02.1999 “Për Informacionin e Klasifikuar Sekret Shtetëror”. I ndryshuar;

– VKM nr. 188, Dt. 04.03.2015 “Për miratimin e Rregullores për Sigurimin e Personelit”;

– VKM Nr. 836, Dt. 14.10.2015 “Për miratimin e Rregullores për punën me Informacionin e Klasifikuar të NATO-s dhe Bashkimit Evropian” dhe akteve ligjore në zbatim.

Gjithashtu, ka shmangur të gjitha Agjencitë e Sigurisë Kombëtare dhe Ndërkombëtare në vendet ku ka jetuar dhe studiuar kandidati për Ministër për Evropën dhe Punët e Jashtme, Z. Gent Cakaj. Antishqiptarizmi juaj dhe simpatia e dashuria që keni pasur e keni për sllavët, është e njohur tashmë që nga paraardhësit tuaj (Enver Hoxha me Miladin Popoviçin, Dushan Mugoshat & Co duke vrarë me mijëra kosovarë, vetëm për t’i bërë qefin serbëve) dhe atë e ke bërë me vepra të cilat jeni munduar t’i kamufloni me “perden e nacionalizmit propagandistik”. Ku ishit dhe cili është kontributi që ju, “patrioti dhe intelektuali i madh”, bëre gjatë kohës që makineria kriminale e Milosheviçit vriste, përdhunonte dhe shfaroste një popull të tërë në Kosovë, ndërkohë që sot ministrin e tij Vuçiçin i quani mik dhe po u plotësoni qëllimet që nuk arritën t’i fitojnë me luftë, por që po i arrijnë nëpërmjet politikës tuaj mjerane dhe kalamajve të sapo hyrë në politikë? Nostalgjinë që kishit për sllavët e ke shprehur qartë dhe me aktin tuaj zyrtar si Kryetar i Bashkisë së Tiranës, duke i dhënë çelësin e kryeqytetit një këngëtari serb Goran Bregoviçit, i cili ishte frymëzimi i çetnikëve, si dhe kohët e fundit u dhuruat serbëve dhe Lahutën (pjesë të trashëgimisë shqiptare në UNESCO), që ta “gëzojnë” si trashëgimi e serbëve! (sigurisht pasi ministrja e kulturës ishte atje vetëm për qokat tuaja). Gjatë qeverisjes tuaj, në sa shtete keni lobuar për njohjen e pavarësisë së Kosovës, në organizatat e ndryshme ndërkombëtare, sa herë i ke përkrahur aleatët tanë strategjikë SHBA-të etj., … gjatë votimeve të rëndësishme, ku pa ndihmën e tyre sot Kosova por dhe Shqipëria do të ishim në miniaturë?! Deri më sot nuk duhet t’u mohohet “merita” që keni promovuar, suportuar, shitur e lobuar, nëpërmjet strukturave dhe individëve të rekrutuar të agjenturave antishqiptare në poste mjaft të rëndësishme të institucioneve të sigurisë, ekonomisë dhe politikës së jashtme!. Nuk është rastësi që me ardhjen e “Rilindjes” tuaj në pushtet emërove në krye të Institucionit të Mbrojtjes dhe sot Kryetare e Komisionit për Politikën e Jashtme një person që sipas gazetave greke kishte qënë një punonjëse argëtimi në Greqi “Dr.” Kodheli (dhe sot e kësaj dite nuk është hedhur në gjyq media greke), si drejtues të Shtabit të Përgjithshëm të FA, Brigadier pijetari Bazo, i cili ishte një “nxënës i mirë” i lobit të fqinjëve të Jugut gjatë kohës së studimeve në Kolegjin e Luftës, etj. Dhe kjo “rastësi” ka vazhduar dhe në shumë institucione të tjera me rëndësi kombëtare, ku lista është mjaft e gjatë, por nuk dua të krijoj pasiguri tek bashkëkombasit tanë! Rastësi, nuk besoj të jetë dhe rasti i fundit i propozimeve tuaja delirante, për plotësimin e dëshirave të mercenarëve të UDB-së dhe tezave Ruso-Serbe për shkëmbim territoresh, apo futjen e klientelës ruse në blerjet e pasurive, trojeve dhe ndërtimeve në Shqipëri nga shtetas rus nëpërmjet blerjeve fiktive nga shtetas jo rusë për llogari të shtetasve apo kompanive ruse! Të gjitha këto veprime të veprimtarisë të “Rilindjes”, bëjnë që Siguria Kombëtare dhe interesat gjeopolitike të Shqiptarëve të cenohen mjaft rëndë nga pushtetarë të papërgjegjshëm. Pritshmëria e shoqërisë shqiptare është e sinkronizuar me objektivat e aleatëve të fuqishëm ndërkombëtarë si SHBA dhe BE, kurse segmente të qeverisë duke iu kundërvënë dinakërisht, kanë stonuar përpara faktorit ndërkombëtar, duke marrë trajtën e përpjekjeve anti historike të Shqipërisë. Interesat shqiptare janë në një aleancë ndërkombëtare si NATO, SHBA dhe BE. Ne shqiptarët kërkojmë me forcë një shtet që pasuritë e popullit nuk i negociohen nëpër lozha e hotele luksoze, nga ministra hajdutë ordinerë për interesa grupesh e klanesh, qoftë vendase apo të huaja, por që i nxjerr në treg, hapur dhe në mënyrë transparente jo me format masovike të qeverisjes, por sipas metodave që ofrojnë demokracitë e zhvilluara. Detyrimi për t’u dhёnё llogari shtetasve mbaron vetёm atёherё, kur shteti nuk ёshtё mё nё gjendje ta kryejë detyrёn e sigurimit tё jetës e paqes.