Pas zyrtarizmit të ministrave të rinj të kabinetit qeveritar Rama II, ka reaguar kryetari i Partisë Demokratike Lulzim Basha. Në një status në Facebook, Basha shkruan se me këtë qeveri është rikthyer në pushtet elita komuniste.
Në këtë aspekt, kreu i demokratëve përmend emërimin e Gramoz Ruçit në krye të Kuvendit, Fatmir Xhafajn si ministër të Brendshëm, Ditmir Bushatin te Ministria e Jashtme dhe Sonila Qaton si ministre të shtetit për mbrojtjen e sipërmarrësit.
Statusi në Facebook i Lulzim Bashës:
“Asgjë e re, vazhdim dhe thellim i së keqes. Kjo është qeveria e thellimit të korrupsionit dhe të krimit. Jo vetëm Edi Rama, por edhe Fatmir Xhafa, Arben Ahmetaj, Damian Gjiknuri e pothuajse të gjithë ministrat e tjerë janë garancia e provuar për korrupsionin dhe krimin.
Kjo është qeveria e konsolidimit të rikthimit në pushtet të elitës komuniste. Tridhjetë vjet pas rënies së komunizmit, Shqipëria sot drejtohet nga disa nga figurat famëkeqe komuniste ose pinjollët e tyre nga Edi Rama tek Gramoz Ruçi, Fatmir Xhafaj, Bushati e Qato e qindra të tjerë në poste kyçe qeverisëse.
Kjo është qeveria e thellimit të sundimit privat të Edi Ramës dhe një grushti njerëzish. Kush mendoi se “takimet me popullin” dhe ballafaqimi me hallet e rënduara të njerëzve e bënë Edi Ramën të reflektojë, sot kuptoi që kjo qeveri nuk do jetë kurrë qeveria e popullit dhe nuk do punojë kurrë për popullin.
Opozita ka detyrën dhe përgjegjësinë që bashkë me qytetarët të mos lejojë të shkojë deri në fund ky projekt i zi për vendin tonë”.
