Presidenti i Republikës, Ilir Meta ishte i pranishëm në ceremoninë e vlerësimit të ministrit të Jashtëm të Turqisë, Mevlüt Çavuşoğlu, me çmimin “Doctor Honoris Causa”, të organizuar nga Universiteti “Mehmet Akif Ersoy”, në bashkëpunim me Fondacionin Maarif dhe Universitetin e Tiranës.
Në fjalën e mbajtur në këtë aktivitet, Presidenti Meta vlerësoi kontributin e Çavushoglu dhe e cilësoi këtë iniciativë si shprehje të nivelit të shkëlqyer të marrëdhënieve midis dy vendeve.
Gjithashtu, Presidenti Meta u shpreh se Shqipëria dhe Turqia zhvillojnë marrëdhënie të partneritetit strategjik dhe intensiv në të gjitha fushat e bashkëpunimit, nga ato të bashkëpunimit ekonomik e tregtar, e deri tek bashkëpunimi në fushat më delikate, ato të sigurisë.
FJALA E PLOTE E PRESIDENTIT META
Është kënaqësi që marr pjesë sot në këtë Simpozium të dytë Ndërkombëtar Mehmet Akif Ersoy dhe në ceremoninë e ndarjes së çmimeve në Shkencë dhe Art.
Kënaqësia është e dyfishtë pasi sot ju do të vlerësoni një mikun tonë shumë të mirë Ministrin e Jashtëm të Turqisë, zotin Çavushoglu, një personalitet i njohur edhe në nivel evropian, edhe në nivel ndërkombëtar dhe botëror. Përfitoj nga rasti të përgëzoj për këtë, drejtues të Universitetit të Tiranës dhe Universitetit “Mehmet Akif Ersoy” që në bashkëpunim të ngushtë me Fondacionin arsimor turk “Maarif” kanë ndërmarrë këtë iniciativë.
E shoh këtë iniciativë jo vetëm si një vlerësim të lartë për kontributin e zotit Çavushoglu, por edhe si shprehje të nivelit të shkëlqyer të marrëdhënieve midis dy vendeve.
Lidhjet tona janë historike, miqësore e vëllazërore. Vetë emri i Mehmet Akif Ersoy-it është një prej simboleve më të fuqishme të këtyre lidhjeve krahas personaliteteve të shquara si Sami Frashëri, e të tjerë, që lidhin fort vendet dhe kombet tona.
Sot, dy vendet tona zhvillojnë marrëdhënie të partneritetit strategjik dhe intensiv në të gjitha fushat e bashkëpunimit, nga ato të bashkëpunimit ekonomik e tregtar, e deri tek bashkëpunimi në fushat më delikate, ato të sigurisë.
Të dy vendet jo vetëm që janë anëtare të NATO-s, por dhe kontribuuese të tyre në luftën kundër terrorizmit dhe ekstremizmit të dhunshëm që është një kërcënim serioz për paqen dhe sigurinë e vendeve tona dhe për prosperitetin e qytetarëve tanë.
Dua të shpreh njëkohësisht mirënjohjen për ndihmën dhe asistencën teknike që Turqia i ka dhënë Shqipërisë në shumë aspekte, si në përmirësimin e infrastrukturës, në fushat e shëndetësisë e të bujqësisë, por në veçanti në fushën e arsimit e të kulturës që na ka mbledhur sot. Turqia ishte ndër vendet e para që mbështeti rimëkëmbjen sociale dhe ekonomike të Shqipërisë në fillim të viteve ’90.
Me mijëra studentë janë arsimuar e trajnuar në shkollat e universitetet civile dhe ushtarake në Turqi, prej më se 25 vitesh, duke i rritur mjaft kontaktet e drejtpërdrejta mes njerëzve tanë, dhe duke forcuar miqësinë tradicionale midis dy popujve.
Po kështu në memorien e kujtdo në botë është gdhendur fort roli shumë domethënës i Turqisë për afirmimin dhe pavarësinë e Kosovës dhe për njohjen e saj ndërkombëtare. Ne vlerësojmë gjithçka që Turqia ka bërë për Shqipërinë dhe shqiptarët, në veçanti në këto tre dekadat e fundit dhe jemi thellësisht mirënjohës për këtë.
Jam i bindur se falë, veçanërisht këtyre marrëdhënieve të shkëlqyera dhe lidhjeve ndër-njerëzore, e ardhmja miqësore dhe vëllazërore e bashkëpunimit mes dy vendeve tona do të jetë edhe më fortë, edhe më e sigurt, edhe më e qëndrueshme.
Njëkohësisht dua të theksoj se sot jetojmë në një botë më të trazuar se disa kohë më parë. Mjafton të përmendim krizat të cilat kanë sulmuar stabilitetin në rajonet ku jetojmë, mjafton të përmendim miliona e miliona njerëz të zhvendosur nga dhuna dhe nga konflikti, ashtu sikurse do të mjaftonte kontributi që Turqi ka dhënë duke mikpritur miliona refugjatë në vendin e saj. Të gjithë vendet tona dhe Evropa t’i jenë mirënjohëse asaj për këtë kontribut madhor për sigurinë, paqen, por edhe në ndihmë të njerëzve në nevojë.
Jam i sigurt se këto sfida të mëdha mund t’i përballojmë vetëm duke bashkëpunuar më ngushtë dhe më fort me njëri-tjetrin. Ndaj, duke shprehur edhe një herë kënaqësinë që marr pjesë në këtë aktivitet dhe duke falënderuar për organizimin e tij këtu në Tiranë, dua njëkohësisht edhe të shpreh falënderimet më të përzemërta për Presidentin Erdoğan dhe mesazhin e tij të fundit mjaft të përzemërt dhe vëllazëror që i drejtoi popullit shqiptar me rastin e ditës së Flamurit, pak ditë më parë.
Dua t’ju siguroj zoti Ministër që këto ndjenja miqësore dhe vëllazërore janë reciproke dhe janë të përjetshme midis dy popujve tanë dhe dy vendeve tona që kanë sfida të përbashkëta përpara.
