LSI paralajmëron Veliajn: S’japim votën për rritjen e çmimit të ujit nëse nuk plotësohen këto kushte

425
Në një kohë ku sot pritet të mblidhet Këshilli Bashkiak i Tiranës për rritjen e çmimit të ujit të pijshëm me 44% në kryeqytet, LSI ka paralajmëruar se nuk do bashkojë votat me PS për këtë nismë nëse nuk plotësohen disa kushte.
“Me angazhimin e përgjegjshëm e të pa ndryshueshëm në mbrojtje të interesit të qytetareve,

Me vendosmërinë për të qenë zëdhënës të interesit publik dhe në koherencë me qëndrimin e LSI-së si forcë politike konstruktive;

Për të garantuar një vendimmarrje të drejtë, ligjore e transparente dhe funksionale;

Grupi i këshilltarëve të LSI do të vazhdojë t’i qëndrojë fort idesë se çështja e çmimit të ujit të pijshëm në Tiranë nuk mund të mbetet peng i interesave të vogla apo të mëdha të asnjë individi, biznesi të lidhur me politikën apo qoftë edhe e ndonjë partie politike. Ne jemi të qartë dhe të prerë në qëndrimin tonë që është kryekëput në mbështetje të interesit të qytetarëve të Tiranës. Për këtë e kushtëzojmë votën tonë me këto pika:

a). Të merren masa urgjente për ndërprerjen e lidhjeve të paligjshme dhe furnizimin preferencial që i bëhet disa bizneseve për të luftuar informalitetin dhe për të rritur masën e faturimeve si mundësia reale për të rritur të ardhurat, me parë se të mendohet për rritjen e çmimit.
b). Të përjashtohen nga vendimi për rritjen e çmimit të ujit të pijshëm të gjitha familjet që jetojnë me ndihmë ekonomike si dhe të gjitha familjet e pensionistëve;
c). Të vendosen çmime të diferencuara për bizneset, në varësi të aktivitetit që ato kryejnë, me qëllim që konsumatorët e mëdhenj të ujit të pijshëm si fabrikat e birrës, te pijeve alkoolike dhe freskuese, fabrikat e mishit, të qumështit, të mermerit apo hotelet a komplekset e ngjashme me to, të mos kenë të njëjtat tarifa me baret, kafenetë apo zyrat e shërbimit me më pak se 5 punonjës!
d). Përsa i përket vendimit për dhënien me koncesion të ndërtimit të shkollave, ripërserisim qëndrimin tonë se jemi kundër çdo lloj koncesioni. Jo vetëm në nivel lokal dhe në atë qendror.

Nëse këto propozime të LSI-së nuk reflektohen në projektvendimin e mbledhjes së këshillit bashkiak, grupi i këshilltarëve të LSI-së në këshillin bashkiak të bashkisë së Tiranës, nuk do të jetë pjesë e vendimmarrjes në dëm të interesit të qytetarëve të Tiranës”- tha anëtarja e Këshillit Bashkiak të LSI në bashkinë e Tiranës, Erjona Bixha.

Nëse LSI bashkon votat me PD-në kundër PS-së në Këshillin Bashkiak te Tiranës, atëherë nisma e bashkisë nuk kalon, pasi nuk plotësohen votat e nevojshme.
Sigal