Deputetja e Lëvizjes Socialiste për Integrim, Kejdi Mehmetaj ka reaguar në rrjetin social Facebook me anë të një statusi, për sa i përket ekspozimit të të rinjve ndaj drogave në ambjentet e shkollës. Mehmetaj thekson se rajonet e policisë në Shqipëri, por edhe në gjithë Europën, janë të mbushur me adoleshentë, që në moshë fare të re janë kapur në situata të rënda të thyerjes së ligjit. Sipas saj, shkollat nuk janë më zona të sigurta për të rinjtë, përkundrazi janë ambjentet e para ku të rinjtë prezantohen me këto fenomene. Sa i takon mungesës së veprimit, Mehmetaj ka një mesazh: “Qëllimi i qeverisë nuk është të qeverisë shqiptarët, por të qeverisin për bandat dhe shqiptarët t`i vënë në funksion të tyre”.
Postimi i plotë i Mehmetaj:
Shkolla po fillon, adoleshentët shqiptarë më shumë se kurrë janë të ekspozuar ndaj konsumit dhe shpërndarjes së lëndëve narkotike.
Ndërkohë që vendi zien nga krimi i shpërndarë rrugëve pa frikë e pa tulatje, për fillimin e vitit të ri shkollor, askush nuk është kujtuar të marrë masa.
Sa rrezikohen të rinjtë shqiptarë nga bandat? Sa të ekspozuar janë ndaj përfshirjes në akte kriminale? Sa të lidhur janë të rinjtë me tregun e lëndëve narkotike dhe sa i konsumojnë ato?
Shifrat që vijnë nga organizatat ndërkombëtare bien si këmbana alarmi në familjet shqiptare.
Shqiptarët kanë përqindjen më të lartë në botë të përdoruesve të kokainës. Shqiptarët janë kthyer në vendin kryesor të prodhimit të kanabisit dhe Shqipëria në vendin kryesor tranzit të lëndëve narkotike që synojnë Europën.
Padyshim që faturën më të lartë në gjithë këtë situatë të krijuar e pagujnë të rinjtë. Si rrjedhojë e naivitetit, varfërisë dhe humbjes së shpresës, ata bëhen peng të bandave dhe kthehen në kultivues, shpërndarës dhe përdorues.
Rajonet e policisë në Shqipëri, por edhe në gjithë Europën, janë të mbushur me adoleshentë, që në moshë fare të re janë kapur në situata të rënda të thyerjes së ligjit. Sepse në këto raste nuk dënohen fajtorët e vërtetë, por më të pamundurit e më të pambrojturit.
Shkollat, si qëndrat kryesore të edukimit, nuk janë më zona të sigurta, por ambjentet e para ku të rinjtë prezantohen me këto fenomene. E ndërsa rreziku rritet asnjë masë e re nuk ndërmerret.
Stafet pedagogjike, psikologët, policët, prokuroria, qendrat spitalore e çdo institucion tjetër shtetëror do të duhej të ishin sot të bashkuar me një plan të qartë të çlirimit të rinisë nga fenomenet kriminale që po shkatërrojnë jo vetëm të ardhmen, por edhe shpresën dhe ëndrrën.
Mungesa e veprimit tregon qartazi një gjë: Qëllimi i qeverisë nuk është të qeverisë shqiptarët, por të qeverisin për bandat dhe shqiptarët t`i vënë në funksion të tyre.
Të reagojmë sot, nesër do jetë shumë vonë!
