Ajo që pritej dhe hamendësohej, duket se ka nisur të zbatohet në terren. Militantët ishin të parët, tani kanë nisur të shkojnë drejt LSI edhe drejtuesit e degëve lokale të PS. Kjo ka ndodhur në Përrenjas me kreun e PS lokale, zotin Rexhep Facja, i cili ka dhënë dorëheqjen dhe ka kaluar tek dega e LSI, duke deklaruar “moskthimin tek ajo parti, e cila nuk ka mbajtur premtimet, nuk ka gjetur gjuhën e mirëkuptimit me bazën, nuk ka bërë asnjëherë takime transparente me ata që i votuan masivisht në 23 qershor, si dhe kundërshtime të tjera parimore”.
Zhgënjimi i socialistëve edhe nga qeverisja e “Rilindjes”
Dega e PS Përrenjas ka qenë deri para 23 qershorit 2013, një ndër degët “lider”, ku dihej se vota për të majtën ishte e padiskutueshme, por duket se mungesa e mbajtjes së premtimeve, rritja e numrit të papunësisë, numrit të familjeve të varfra, mungesa e investimeve, rrënimi edhe i atij biznesi gjysmak nga rritja e taksave, emërimet nepotike të deputetit të PS Taulant Balla, shkaktoi reaksion tek baza dhe drejtuesit e PS lokale. Pas largimit të dhjetëra qindra militantëve drejt LSI, duket se tashmë i kishte mbetur radha kreut të degës zotit Rexhep Facja. Ai ka mbajtur dikur postin e drejtorit të PTT në Librazhd, dhe ka qenë zyrtar i mirë i Bashkisë Përrenjas. Zoti Facja është një kontribuues i vjetër i PS, dhe njihet si njeri organizator i strukturave socialiste në bazë. Largimi i tij shihet si një protestë ndaj qeveritarëve që e kanë harruar Përrenjasin, qytetarët dhe banorët e fshatrave. Ata jetojnë në një mjerim të thellë, të papunë, të pashpresë, pa ndihma ekonomike, një qytet që po tkurret çdo ditë.
Përrenjasi i papunësisë dhe i mjerimit
Në Përrenjas mungojnë investimet, mungojnë projektet e hartuara dhe miratuara nga qeveria pavarësisht se Bashkia ka dorëzuar shumë prej tyre. Përrenjasi, që dikur mbahej me minierat, sot ka një ushtri të papunësh. Mbi 65 për qind e numrit të popullsisë është e papunë, ndërkohë që qyteti dhe fshatrat po braktisen çdo ditë nga të rinjtë dhe të moshuarit, që largohen drejt emigrimit. Kjo situatë kaq e zymtë, dhe pamundësia e realizimit të premtimeve të fushatave, largimi dhe mungesa e gjatë e pranisë të deputetëve dhe ministrave, ka sjellë reagimin edhe nga baza socialiste dhe së fundi edhe të kreut të PS Përrenjas Rexhap Facja. Largimi i tij ndoshta nuk ka qenë i papritur, dhe kjo ka sjellë edhe rritjen e interesimit të strukturave qendrore nga Tirana. Aktualisht, dega e PS në Përrenjas ka mbetur pa kryetar, ndërkohë që shumica e bazës po anëtarësohen tek LSI. Kjo e fundit ka nisur të fuqizojë strukturat e veta në këtë rreth, gjë e cila po ndodh edhe me shumë qytete. Pas Elbasanit dhe Librazhdit, duket se edhe Përrenjasi, si një “gur dominoje”, po rrëshqet drejt LSI, e cila shihet si një forcë politike më bindëse, më e hapur, më transparente, dhe më serioze në mbajtjen e premtimeve elektorale. Pritet që në javët e ardhshme Rama të nisë drejt Përrenjasit, ndoshta Sekretarin e Përgjithshëm Ruçi, për të ringritur degën lokale, e cila pothuajse është shpërbërë e gjitha.
Ilir DURMISHI