Partia Demokratike ka reaguar sërish sot duke akuzuar Qeverinë se po mbështet krimin, pas lajmeve të publikuara në mediat greke për organizatën ndërkombëtare të drogës që drejtohet nga shqiptari “Baron i Ballkanit”. PD thotë se Klemend Balilaj është i shpallur në kërkim ndërkombëtar dhe po i bën karshillik ligjit në Sarandë, pasi ka mbrojtjen e kryeministrit Rama dhe ministrit të Brendshëm Saimir Tahiri.
“Rënia e shtetit ligjor në Shqipëri dhe triumfi i mafias me mbështetje qeveritare është sot kryelajmi i CNN dhe mediave të tjera rajonale dhe botërore.
Prej më shumë se 24 orësh i shpalluri në kërkim ndërkombëtar Klement Balilaj për narkotrafik nuk arrestohet por i bën karshillek ligjit nga zyrat shteterore të drejtorisë së Transporteve në Sarandë.
Nëse Klement Balilaj nuk do të kishte mbrojtjen e Ministrit të Brendshëm Saimir Tahiri dhe shefit të tij Edi Rama a mund të ndodhte kjo?
Sipas CNN, policisë greke, vetë policia shqiptare i është justifikuar se “në Shqipëri nuk mund ta prekim sepse ky person ka lidhje me politikanë të nivelit të lartë”. Sajmir Tahiri duhet të largohet një orë e me parë dhe të vihet para drejtësisë si garantuesi dhe mbrojtësi i bandave të trafikut ndërkombëtar të drogës, gjobvenësve, kriminelëve dhe njeriu që ka kriminalizuar Policinë e Shtetit. Por çlirimi i vërtetë i Shqipërise nga krimi i veshur me pushtet dhe pushteti i bërë njësh me krimin vjen vetëm me largimin e kësaj qeverie”.