Gjosha-Ramës: Nuk është sukses! Qytetarët po e braktisin vendin sepse nuk ka mbetur më asnjë fije shpresë

129
Nga Klajda Gjosha
Në Konferencën e sotme per emigracionin, ajo që të bie në sy është mania e Kryeministrit për të trajtuar largimin e Shqiptarëve si diçka normale, historike, të lidhur me tregun dhe lëvizjen e lirë. Madje ai e krahason Shqipërinë me Kroacinë, me Poloninë, duke harruar faktin që këto janë vende anëtare dhe me një kontekst tjetër të arsyeve pse qytetarët e tyre lëvizin drejt vendeve të tjera.
Nuk e di si e shpjegon Kryeministri faktin që numri i azilkërkuesve në Francë, Suedi, Gjermani ka qënë përtej limiteve gjatë viteve të fundit, madje ku qytetarët kanë pranuar të jetojnë në çadra vetëm për të mos bërë kompromis me realitetin shqiptar? Si e spjegon ai faktin që vetëm në tre muajt e parë te 2018 edhe Greqia është vënë në alarm për numrin e kërkesave për azil, në një kohë kur mos harrojmë që të gjithë shqiptarët kanë minimumi nga një të afërm që jeton në Greqi prej vitesh? Si e shpjegon faktin që po shkelen të gjitha rregullat e lëvizjes së lirë duke kaluar përtej afateve 90 ditore të qëndrimit në hapësirën Schengen?
Qytetarët po e braktisin vendin sepse nuk ka mbetur më asnjë fije shpresë. Sepse të gjesh sot një vend pune është kthyer në lluks! Sepse qeverisë i janë errësuar sytë para pushtetit dhe refuzon të ulet me këmbë në tokë për të dëgjuar britmat që vijnë nga familjet në nevojë, nga rinia, nga bankierët, nga mësuesit, nga mjekët, nga bizneset!
Megjithatë shpresa e fundit që i mbetet shqiptarëve është se shpeshhërë arroganca dhe deliri paralajmërojnë fundin e një lideri që po i merr frymën atyre çdo ditë!