Komisioni Evropian pritet të deklarojë se Shqipëria dhe Maqedonia duhet të fillojnë bisedimet për anëtarësimin në Bashkimin Evropian, ndërkohë që abuzimi me të drejtat e njeriut në Turqi nënkupton që për këtë të fundit bisedimet e anëtarësimit do të mbeten pezull, shkruan EUobserver. “Në bazë të progresit të arritur, Komisioni Evropian rekomandon hapjen e negociatave me Shqipërinë”, pritet të deklarojë nesër ky komision në raportin e tij vjetor për zgjerimin, sipas një drafti të parë nga EUobserver. Edhe për Maqedoninë, ky projekt-dokument ka të njëjtën formulë. Ky është rekomandimi i parë për Shqipërinë. Ai vjen 15 vite pasi Shqipëria nënshkroi Paktin e Stabilizim-Asociimit me BE-në dhe pothuajse 10 vite pasi shteti i Ballkanit Perëndimor, që dikur ishte diktaturë komuniste, u anëtarësua në NATO. Ndërkohë, Maqedonia ka qenë gati për fillimin e bisedimeve që në vitin 2005. Por, vendet e BE-së nuk kanë pranuar asnjëherë ta bënin këtë, sepse Greqia vendosi veton pasi emri i Maqedonisë përfaqëson një pretendim territorial në lidhje me një rajon grek me të njëjtin emër. Rekomandimi, që publikohet sot, vjen në kuadër të shpresave të BE-së se Shkupi dhe Athina janë mjaftueshëm pranë gjetjes së një zgjidhjeje duke i mundësuar Këshillit të BE-së të hapë bisedimet me Maqedoninë në fund të këtij viti. Ai gjithashtu vjen edhe në kuadër të një strategjie të re të Komisionit për të përshpejtuar zgjerimin. Ministrat e Punëve të Jashtme të BE-së do të diskutojnë gjithashtu për Ballkanin Perëndimor në Luksemburg. “Pritet që ata të rikonfirmojnë angazhimin e tyre për të lehtësuar dialogun mes Serbisë dhe Kosovës për normalizimin e marrëdhënieve dhe diskutimin e çështjeve të sigurisë në rajon”, sipas një diplomati të BE-së.