Vazhdon të jetë e bllokuar autostrada që lidh Tiranën me Elbasan, në kahun e saj që vjen drejt kryeqytetit. Afrim Qendro, drejtor i Autoritetit Rrugor Shqiptar, ka bërë të ditur se ende nuk ka një datë se kur aksi Elbasan-Tiranë do të zhbllokohet nga masivët e mëdhenj shkëmbor që bllokuan autostradën ditën e premte. Pas inspektimit në terren, Qendro, në një prononcim për mediat, u shpreh që trafiku do të rregullohet në një sens të rrugës përmes një bypass-i. Drejtori i ARRSH ka shtuar gjithashtu se tashmë kanë nisur hetimet dhe pas daljes së konkluzioneve do të dalin edhe përgjegjësisë e firmës që ka ndërtuar segmentin në fjalë. “Ende nuk ka një datë se kur do të jetë e hapur plotësisht. Rruga do të hapet, pasi të jemi të sigurt që jeta e qytetarëve nuk rrezikohet. Nuk jam në dijeni për rrëshqitje të tjera, rruga është marrë në dorëzim nëntorin e vitit të kaluar. Për sa i përket përgjegjësive të firmës do të dalin pas analizës së plotë”, u shpreh Qendro. Sipas tij, pasi të dalë studimi gjeologjik dhe analizat, do të flitet për shkaqet dhe masat. “Është shumë shpejt për të arritur në konkluzione dhe për të folur për përgjegjësitë”, deklaroi ai. Aktualisht lidhja e Elbasanit me Tiranën bëhet nga Qafa e Kërrabës, ndërsa pritet të bëhet një zgjidhje teknike për të mundësuar sërish përdorimin e tunelit për automjetet që udhëtojnë drejt kryeqytetit.
