Kryeministri i zgjedhur Edi Rama, i shoqëruar me disa ministra të tij, takohet me Kryeministrin e Turqisë
Kryeministri i zgjedhur në 23 Qershor 2013, Edi Rama, edhe pse nuk ka marrë mandatin zyrtarisht, ka filluar që të bëjë vizita dhe takime me udhëheqësit e ndryshëm të vendeve europiane. Kësaj here, kryeministri i zgjedhor, Edi Rama ka vizituar Turqinë, i shoqëruar nga ministrat e tij, nga ministri i tij i Jashtëm, Ditmir Bushati, nga ministri i Brendshëm, Saimir Tahiri, nga ministri i Shëndetësisë, Ilir Beqja, nga ministri i Transportit dhe Infrastrukturës, Edmond Haxhinasto.
Bashkëpunimi reciprok mes dy vendeve
Bashkëpunimi reciprok mes dy vendeve, sidomos në fushën e shëndetësisë, energjisë, turizmit dhe infrastrukturës kanë qenë në qendër të takimit të djeshëm mes kryeministrit të ardhshëm Edi Rama me atë turk, Erdogan. Zyra për shtyp e PS-së ka zbardhur sot takimin mes tyre, duke dhënë detaje rreth asaj që është biseduar. Sipas PS-së, bashkëpunimi në NATO ishte një tjetër temë e rëndësishme e bisedës mes dy Kryeministrave që marrëdhënien mes dy vendeve e konsideruan strategjike.
Deklarata e Ramës pas takimit
“Takimi me Kryeministrin Erdogan ishte vazhdimi i një bisede të filluar për të vendosur së bashku piketat e një bashkëpunimi mes Shqipërisë dhe Turqisë që do të jetë një bashkëpunim me një intensitet të panjohur më parë. E për këtë arsye ne ngritëm paraprakisht një grup pune, ndërsa sot erdhëm me disa nga ministrat që ishin dhe pjesëtarë të grupit të punës për të çuar përpara idetë dhe për të hedhur draftin më elementar të një projekti të përbashkët bashkëpunimi dhe zhvillimi. Ne e konsiderojmë Turqinë një partner strategjik dhe ne kemi vlerësuar se ky partneritet ka një potencial të jashtëzakonshëm e të pashfrytëzuar dhe jemi të bindur se në katër vitet e ardhshme do bëjmë të mundura gjëra të cilat fatkeqësisht në të shkuarën nuk janë bërë dot të mundura”.
