Drafti i PD për dekriminalizimin futet në kalendarin 3-javor të Kuvendit

430
Konferenca e kryetarëve fut në kalendarin 3 javor të punimeve draftin e Partisë Demokratike për dekriminalizmin.
Nisma do të diskutohet në Komisionin e posaçëm sipas kërkesës së opozitës.
Ndërkohë në seancën e sotme plenare të Kuvendit, rendi i ditës parashikon diskutimin e disa pr/ligjeve të rëndësishme.
Ndër to veçohen disa ndryshime në ligjin “Për pushtetet dhe autoritetet e drejtimit e të komandimit të Forcave të Armatosura”, disa shtesa në ligjin “Për procedurat tatimore në Republikën e Shqipërisë”(i diskutuar me procedurë të përshpejtuar nga komisioni i Ekonomisë), ndryshimet në ligjin “Për metrologjinë”, etj.
Me rëndësi është dhe pr/ligji “Për sektorin e gazit natyror”, si dhe miratimi i kontratës së koncesionit të formës “BOT”(ndërtim, shfrytëzim dhe transferim) të një porti të llojit MBM në Porto Romano, ndërmjet qeverisë shqiptare dhe shoqërisë koncesionare “Porti MBM(MULTI BUOY MOORING)’.
Rendi i ditës i Kuvendit përfshin dhe dy projektligje të propozura nga ministria e Inovacionit dhe Administratës Publike, si ai “Për identifikimin elektronik dhe shërbimet e besuara” dhe pr/ligji “Për dokumentin elektronik”, që synojnë krijimin e kuadrit të nevojshëm ligjor për identifikimin elektronik, vulat elektronike dhe shërbime të tjera që lidhen me identitetin virtual dhe transmetimin e sigurt të të dhënave.
Sigal