Autoritetet shqiptare presin ndihmën nga SHBA për të zbuluar kush fshihet pas kompanisë fantazmë që fitoi dy tenderë përmes falsifikimit, por një dokument në QKB dhe rrethi i njerëzve pas “DH Albania” ekspozojnë kompaninë “Gener 2” të biznesmenit Bashkim Ulaj. Të dhënat e siguruara nga BIRN sugjerojnë se autoritetet shqiptare nuk kanë arsye të presin hetimet në Shtetet e Bashkuara për të zbuluar pronarët e vërtetë që fshihen pas kompanisë “Dunwell Haberman”, e regjistruar në Delawere të Shteteve të Bashkuara. “Gjurmët e gishtave” gjendet në Qendrën Kombëtare të Bizneseve dhe tregojnë kompaninë “Gener 2” të biznesmenit Bashkim Ulaj. Më 3 dhjetor, pas lidhjes së kontratës për lotin e parë të Unazës së Re, DH Albania, dega në Shqipëri e Dunëell Haberman vendosi hapjen e një Nipti Sekondar me vendndodhje në sheshrrotullimin Shqiponja. Një mandat arkëtimi i depozituar në QKB tregon se aplikimi për hapjen e adresës së re në kantierin e punimeve është bërë nga Gener 2, përmes një juristeje të kësaj kompanie. Aplikimi i kryer nga “Gener 2”, i gjendur mes dokumenteve të dorëzuara në QKB nga kompania DH Albania nuk është prova e vetme që ngre dyshime se pas “DH Albania” dhe dy tenderëve të fituar prej saj, qëndron biznesmeni Ulaj. Një rreth i ngushtë prej pesë personash, të cilët kanë kryer veprime për llogari të “DH Albania” janë ose punonjës të “Gener 2”, ose të lidhur me aksionerin e saj. “Çështja është në hetim nga Prokuroria, e cila do të zbulojë atë çka ka ndodhur, përgjegjësit për falsifikimin e kryer dhe gjithë transparencën e mundshme për kompaninë,” tha këshilltari i ministrisë së Infrastrukturës për mediat, Dardan Malaj.
Nga Aleksandra Bogdani