Deputeti i PS: Beqaj është palaço, salcën e meritonte ky, jo Nikolla

521
Sigal

Deputeti socialist, Parid Cara, kërkon dorëheqjen e ministrit të Shëndetësisë Ilir Beqaj, duke e cilësuar atë palaço, arrogant dhe në shkelje të ligjit. Duke u nisur nga shkarkimi i drejtorit të Sigurimeve Shëndetësore Tropojë, Cara shprehet se mënyra se si ministri Beqaj po vepron, po krijon kosto për të gjithë qeverinë.

Duke e veçuar incidentin e Lindita Nikollës nga veprimi i Ilir Beqajt, deputeti socialist e cilëson të shëmtuar gjestin e studentes që i hodhi salcë ministres së Arsimit. “Në të kundërt, vezët, salcën dhe domatet i meritonte plotësisht ministri Beqaj”, shprehet Cara.

Deputeti i PS: Beqaj arrogant, duhet të japë dorëheqjen dhe të largohet

Deputeti i PS-së, Parid Cara është i pari deputet ndër socialistët, që duke e quajtur aktin e Ministrit të Shëndetësisë për pushimin e vartësit në Tropojë pse nuk shkoi në mbledhje partie, kosto të panevojshme për Ramën dhe maxhorancën qeverisëse, thekson se Beqaj duhet të japë menjëherë dorëheqjen.

Në një postim në profilin e tij në FB, Cara shkruan se “Ministri, në kundërshtim me të gjitha procedurat ligjore, e konsideron pozicionin që i ka besuar kryeministri, si pronë të cilën mund ta përdorë si të dojë dhe jo si një post që mund të drejtohet vetëm brenda kornizës së parashikuar nga ligji”.

Sipas tij, “Kjo qeveri dhe kjo maxhorancë nuk mund të mbajnë kosto që nuk lidhen drejtpërdrejtë me punën e saj, por me tekat dhe arrogancën e një ministri”.

Postimi i Parid Carës

Një video e transmetuar pak ditë më parë ku ministri i Shëndetësisë, Ilir Beqaj është përgjuar teksa shkarkon me telefon një drejtor, ka ngjallur me shumë të drejtë reagim negativ në opinionin publik.

Ministri, në kundërshtim me të gjitha procedurat ligjore, e konsideron pozicionin që i ka besuar kryeministri, si pronë të cilën mund ta përdorë si të dojë dhe jo si një post që mund të drejtohet vetëm brenda kornizës së parashikuar nga ligji.

Një politikan i përgjegjshëm, pas asaj telefonate të transmetuar në emisionin “Stop” duhet të jepte dorëheqjen menjëherë.

Kjo qeveri dhe kjo maxhorancë nuk mund të mbajnë kosto që nuk lidhen drejtpërdrejtë me punën e saj, por me tekat dhe arrogancën e një ministri.

Ilir Beqja duhet të japë dorëheqjen dhe të largohet, pasi çdo ditë më shumë ai në pozicionin e ministrit është kosto e panevojshme për Qeverinë në sytë e opinionit publik.