Denoncimi: Ja si deputeti Alket Hyseni ia shiti pronën e vjedhur Gon Papulit

378
Irini Bua nga Dhërmiu i bën Apel kryeministrit të anulojë vendimin e vjedhjes së pronës nga deputeti i tij
Ka disa ditë, që banorja nga Dhërmiu Irini Buo ka denoncuar publikisht vjedhjen e 11.000 metrave katrorë tokë të familjes së saj në Bregdet nga deputeti socialist Alket Hyseni, dhe, njëkohësisht i ka bërë apel edhe kryeministrit Rama, që të anulojë këtë vendim të vjedhjes së pronës së saj. Deri tani, kryeministri Rama nuk ka reaguar.

Deputeti i PD-së Alibeaj: Deputeti socialist bashkëpunon me kryeministrin për vjedhje
Partia Demokratike me anë të deputetit Enkelejd Alibeaj ka akuzuar Edi Ramën, si person i përfshirë direkt në grabitjen e pronës së Irini Bua në Dhërmi. Me anë të një deklarate për mediat, Alibeaj është shprehur se Rama bashkë me deputetin e tij Alket Hyseni ka shkelur ligjin dhe vendimet e gjykatave që ndalonin veprimet me pronën e Irini Bua.

Deklarata e deputetit Enkelejd Alibeaj:
Dokumentet e lejes zhvillimore dhe të ndërtimit në pronën e grabitur prej Alket Hysenit, në shkelje të vendimit të Gjykatës, provojnë se Edi Rama është në krye të skemës mafioze për grabitjen e tokave në bregdet. Grabitja e tokës në bregdet me 11 mijë metra katrorë nga deputeti Alket Hyseni, është bërë në bashkëpunim më Kryeministrin e vendit, Edi Rama, i njëjti kryeministër që bërtet për drejtësi dhe përbetohet çdo ditë se po bën shtet. Partia Demokratike ka në dorë dokumente që provojnë se Edi Rama është pjesë e skemës për grabitjen e tokave në bregdet, në rastin konkret të grabitjes së pronës së familjes Bua në Dhërmi.

Le t’i rendisim faktet me radhë.
I emëruar në detyrën e kryetarit të Task Forcës për të evidentuar tjetërsimin e pronave në bregdetin e Jugut nga Vlora në Butrint, Alket Hyseni ka blerë për 230 milionë lekë pronën e tjetërsuar me dokumente të falsifikuar, duke e ditur se prona ishte në proces gjyqësor. Dokumenti vërteton, se në vitin 2015 Gjykata e Vlorës i dha të drejtë familjes së zonjës Irini Bua, duke vendosur pezullimin e çdo veprimi mbi pronën, vendim ky që është akoma në fuqi.

VENDIMI I GJYKATËS
Por pavarësisht këtij vendimi Gjykate, në shtetin mafioz të Edi Ramës transaksionet me pronën në bregdet kanë vazhduar nga falsifikuesi tek Alket Hyseni, pastaj tek ndërtuesi Gon Papuli, që është një nga miqtë e ngushtë të kryeministrit, për të shkuar më pas deri tek vetë Edi Rama. Partia Demokratike ka dy dokumente që provojnë se Edi Rama është pjesë e skemës mafioze për grabitjen e pronave dhe shpjegojnë përse kryeministri ka heshtur deri tani për deputetin e vet Alket Hyseni. Edi Rama, me firmën e tij, ka vendosur dy herë rresht që, në tokat në bregdet të familjes Bua, në Dhërmi, të ndërtohet resort turistik, duke mos marrë parasysh vendimin e Gjykatës për pezullimin e çdo veprimi me pronën. Dokumenti i parë tregon se Edi Rama, si Kryetar i Këshillit Kombëtar të Territorit, ka firmosur lejen për zhvillimin e kompleksit turistik dhe një vit më pas ka firmosur sërish, për dhënien e lejes së ndërtimit në këtë kompleks për mikun e tij ndërtues Gon Papuli dhe për deputetin e tij, Alket Hyseni. Është e qartë se skema mafioze e grabitjes së tokave në bregdetin ka në krye Edi Ramën dhe për bashkëpunëtor deputetin e tij Alket Hyseni që, në kohën e dhënies së lejeve nga Edi Rama, drejtonte Zyrën Kundër Pastrimit të Parave, prej nga ka mbikëqyrur edhe transaksionet financiare të bankës së gruas së kryeministrit. Peshk më të madh se kaq drejtësia nuk ka ku të gjejë dhe është rasti ideal për t’u dhënë shqiptarëve shpresën reale për një drejtësi jopolitike, që punon për qytetarët dhe jo për pushtetarët.

Irini Bua tregon si ia vodhi tokat deputeti socialist Alket Hyseni
Irini Bua është një nga banorët e Dhërmiut, e cila denoncoi publikisht në në emisionin “Të paekspozuarit” grabitjen e tokës në bregdet. Irini Bua, gruaja që denoncoi grabitjen e tokës së saj në emisionin “Të Paekspozuarit” të Top Channel, shpreson të gjejë drejtësi. “Gjithë prona është 22 mijë metra, 11 mijë metra i ka marrë Alket Hyseni, 11 mijë metrat e tjera janë ndarë mes Arjan Hasanit, Ilia Tako dhe Gent Malkos”, tregon Irini Bua. Ajo thotë se ka kallëzuar, jo vetëm deputetin e Vlorës Alket Hyseni, por edhe kryeministrin Edi Rama. “Alket Hysenin e kam denoncuar tek Krimet e Rënda, nuk më është kthyer përgjigje. Kam bërë kallëzim penal kundër Edi Ramës për shpërdorim detyre për arsye se ka dhënë leje ndërtimi mbi pronën e marrë masë sigurie”, tregon ajo. Historia e zonjës Irini Bua nis që në vitin 1991, kur pronat në Dhërmi nuk u ndanë vetëm sipas ligjit 7501. Ajo thotë se pati një ndërthurje për ndarjen e tokës mes kufijve të vjetër dhe ligjit që nisi të zbatohet menjëherë pas rënies së diktaturës. “Nuk e kam ndarë pronën me 7501-shin, por ka marrë gjithsecili pronën e tij. Kështu ramë dakord”, thotë ajo. Por, gjithçka ka ngecur në vitin 2013, kur mes fisit Bua, të cilët Irini i përmend me emra nisën proceset gjyqësore, pasi një prej pjesëtarëve të familjes që ishte arratisur në Amerikë rezultonte i përjashtuar nga lista e përfituesve të pronës së trashëguar. Madje, në këtë rast është përmendur edhe një testament i lëshuar që në vitin 1986, për të cilin Irini Bua thotë se është i falsifikuar, sepse në atë kohë as bëhej fjalë për ndarje prone. “Ne pamë që ai përdori një testament të 86-s. Që ishte në dosjen e 2013-s, ku shkruhet se: “Athina Bua, ia lë të gjithë pasurinë pas vdekjes”. Në një kohë kur prona nuk kishte dalë për t’u marrë”, sqaron ajo. Zonja, që denoncoi skandalin e pronave në Dhërmi flet me emra konkretë dhe disponon të gjithë dokumentacionin e plotë për vjedhjen e një sipërfaqeje prone, e cila ndonëse është nën masë sigurie në të ndërtohet, pasi ka kaluar në dy apo tre shitje. “Shitja e parë është bërë tek Ilia Taka, Thedhori Dumo në Dhërmi është sekseri i Alket Hysenit, shitjen tjetër e ka bërë Arjan Hasani”, thotë ajo.
Pavarësisht këtij vendimi Gjykate, në shtetin mafioz të Edi Ramës transaksionet me pronën në bregdet kanë vazhduar nga falsifikuesi tek Alket Hyseni, pastaj tek ndërtuesi Gon Papuli