Çekia njofton zyrtarisht Beogradin: Ne e kemi njohur njëherë shtetin e Kosovës, nuk ka tërheqje

165

Pas deklaratave të presidentit çek, për mundësinë e tërheqjes së njohjes së shtetit të Kosovës gjatë vizitës në Beograd, të cilat u quajtën të pa përgjegjshme, ka ardhur edhe reagimi zyrtarë nga Ministria e Jashtme e Çekisë. Përmes një njoftimi reagues ndaj pretendimeve të presidentit çek Milos Zeman se do të përpiqet të shohë nëse është e mundur të tërhiqet njohja e Kosovës nga Republika Çeke, konfirmohet se kjo gjë nuk do të ndodhe.

Lajmin e jep agjencia serbe e lajmeve Beta. Sipas kësaj deklarate, MPJ e Çekisë deklaron se ky shtet e ka njohur Kosovën dhe se Republika Çeke nuk e ka tërhequr kurrë njohjen e asnjë shteti, deri më tani.

“Qeveria Çeke njohu Republikën e Kosovës dhe në të njëjtën kohë dha pëlqimin për vendosjen e marrëdhënieve diplomatike. Ishte një njohje de jure, d.m.th. njohje e një shteti i cili është plotësisht dhe përfundimisht në përputhje me pikëpamjet e ligjit ndërkombëtar. Republika Çeke asnjëherë deri më tani nuk ka tërhequr njohjen e asnjë vendi”, është thënë në një deklaratë të MPJ-së së Çekisë, në faqen e saj të internetit.

Deklarata kujton se Kosova është njohur gjithashtu nga rreth 100 shtete anëtare të Kombeve të Bashkuara dhe gjithashtu është pranuar në disa organizata ndërkombëtare si Fondi Monetar Ndërkombëtar ose Banka Botërore.

“Republika Çeke ka një interes të padyshimtë në ruajtjen e marrëveshjeve ndërkombëtare me Republikën e Kosovës, përfshirë detyrimet që rrjedhin prej tyre për të dy palët”, thuhet në deklaratë.

Mediat serbe kujton se Vaclav Klaus dhe Milos Zeman kanë qenë kundërshtarë të vazhdueshëm të njohjes së pavarësisë së Kosovës dhe të dy kanë bllokuar emërimin e një ambasadori Çek në Prishtinë.

Po sipas këtij mediumi, mediat paralajmërojnë se nëse Republika Çeke tërheq njohjen, problemet me këto marrëveshje bilaterale do të shfaqen dhe nuk do të jenë në gjendje të kërkojnë që dispozitat e tyre të përmbushen.

Premisat se Zeman mund të ketë sukses në “iniciativën” e tij gjithashtu janë “shuar” së fundmi, pasi që kryeministri çek Andrei Babisch tha se do të flasë për këtë me Zeman dhe përfaqësuesit e të dy Dhomave të Parlamentit në mbledhjen pas një muaji për koordinimin e politikës së jashtme, por se nuk sheh asnjë arsye që Republika Çeke të ndryshojë qëndrimin e saj ndaj njohjes së Kosovës.