Burri në kërkim, gruaja e Kajmakut fiton tenderin

190

Në një kohë që ish-kryebashkiaku i Vorës Agim Kajmaku është në kërkim policor për tre akuza, gruaja e tij pronare e vetme e kompanisë “Kajmaku” shpk, Merita Kajmaku ka fituar në fund të vitit të kaluar një tender me vlerë 50 mln lekë të vjetra (kufiri ishte 57 mln) për mirëmbajtjen e sipërfaqeve të gjelbërta për Qendrën Spitalore Universitare “Nënë Tereza”.

Në garë ishin katër kompani, njëra është skualifikuar, ndërsa nga tre të tjerat ka fituar firma ”Kajmaku”. Tenderi është dhënë nga drejtoria e blerjeve të përqendruara në Ministrinë e Brendshme. Pronari i firmës deri në 17 korrik ka qenë vetë Agim Kajmaku, por pas zgjedhjes në krye të bashkisë së Vorës ia kaloi pronësinë gruas.

Në muajin korrik 2019, pas akuzave të Partisë Demokratike, se Kajmaku kishte marrë përmes kompanisë së tij, rreth 2.6 milionë euro para publike, të marra përmes tenderave, Kajmaku ia ka transferuar kompaninë Merita Kajmakut, gruaja e Kajmakut, e cila tanimë rezulton se është aksionere e vetme e kompanisë.