Basha, tur në rrethe për përgatitjen e protestës

242
Kryetari i Partisë Demokratike, Lulzim Basha, pritet të nisë një tur takimesh në javën e fundit të vitit, në disa nga qytetet kryesore të vendit. Takimet janë konceptuar në formën e bashkëbisedimit me qytetarët, jo vetëm për zhvillimet politike dhe atë që konsiderohet nga opozita si krizë kushtetuese, por edhe për gjendjen ekonomike të qytetarëve. Burime nga PD-ja theksuan se turi i takimeve është vendosur gjatë një takimi që kreu demokrat ka zhvilluar pak ditë më parë me drejtues të degëve të PD-së. Sikundër bëhet e ditur propozimi është bërë nga disa prej kryetarëve të partisë më të madhe opozitare në rrethe, ndërsa mësohet se ato do të jenë në funksion edhe të protestës që PD dhe opozita pritet të mbajnë në javën e tretë të Janarit. Në këtë takim Bashës i është kërkuar që të zhvillohen takimet në bazë si forma më e mirë për organizimin e protestës së ardhshme. Burimet shprehen se takimet e Bashës me qytetarët do të vijojnë edhe në ditët e para të vitit të ardhshëm, ndërsa nga opozita ende nuk ka një vendim mbi raportet që do të ketë me Kuvendin, pas zgjedhjes të Prokurores së Përgjithshme në mënyrë të njëanshme dhe në shkelje të Kushtetutës nga mazhoranca socialiste.