Nuk ndodhem në qeli VIP, më kanë futur në bodrum, ku nuk ka asgjë. Kështu mësohet t’i jetë përgjigjur deputeti Armando Prenga interesimit të gazetarëve, teksa priste vendimin e Gjykatës së Lartë, të cilët ishin të interesuar nëse ai e kishte parë ndeshjen e futbollit mes Shqipërisë dhe Portugalisë. Prenga ka pohuar se do të dorëzojë mandatin e deputetit vetëm pas vendimit përfundimtar të gjykatës. Deputeti i Qarkut të Lezhës u arrestua mëngjesin e 5 shtatorit, pasi sipas policisë dhe prokurorisë u përfshi në një sherr masiv në Kurbin, ku mbetën të plagosur 7 persona.
Prenga akuzohet nga prokuroria për 3 vepra penale, por deputeti ka mohuar akuzat e ngritura. Ligjvënësi ka pohuar para Gjykatës se nuk janë administruar provat në vendngjarje, ku u kërcënua me jetë. Prenga pranoi se ka qëlluar në ajër për vetëmbrojtje me armën që mbante me leje. Përfaqësuesi e tij ligjor, Baftjar Rusi tha se provat e akuzës nuk justifikojnë masën e arrestit me burg.