Ambasadorja gjermane jep “ultimatum”: Azilkërkuesit shqiptarë do t’i kthejmë me forcë, 5 vite do ndalohen të hyjnë

214
Ambasadorja gjermane në vendin tonë, Susanne Schütz, në një konferencë të zhvilluar nga INSTAT, ka thënë se azilkërkuesit shqiptarë në Gjermani, nëse është nevoja do të kthehen me forcë në Shqipëri.
Shütz ka shtuar se një tjetër masë që shteti gjerman mund të ndërmarrë është ndalimi i hyrjes për 5 vite.
Më tej ajo ka ripërsëritur apelin se shqiptarët janë të mirëpritur në Gjermani për të punuar me anë të vizave të rregullta.
“Shqipëria është një vend kandidat i BE dhe nuk është një vend me persekutim politik, që ishte një nga arsyet për të dhënë azil dhe do të kthehen në Shqipëri edhe nëse duhet me forcë dhe do të ndalohen të hyjnë në Gjermani deri në 5 vjet. Pavarësisht këtyre politikave tregu është i hapur për ata punëtorë të kualifikuar, nëse ata plotësojnë kushtet kanë mundësi të aplikojnë për viza punë dhe 3 mijë shqiptarë kanë përfituar në 2017 nga kjo. Bashkëpunimi me zyrën e punësimit ofron mundësi për të kualifikuarit në Shqipëri. Ndërsa shumë shqiptarë largohen nga vendi, jo vetëm në Gjermani por edhe në vende të tjera perëndimore, dëgjoj shpesh nga të rinjtë që ata do të preferonin të qëndronin në Shqipëri nëse do të kishin një shans më të mirë për të gjetur punë dhe për të siguruar një jetë më të mirë dhe kujdes të mirë shëndetësor. Kjo është një sfidë e madhe për qeverinë shqiptare dhe unë e vlerësoj që qeveria shqiptare është e vendosur për të siguruar një jetë më të mirë për shqiptarët këtu,” ka thënë ambasadorja.