Ambasadori i SHBA në vendin tonë, Donald Lu rithekson edhe njëherë rëndësinë e zbatimit sa më parë të reformës në drejtësi, e kryesisht të ligjit të Vettingut. Në ditën e tretë të simpoziumit kundër korrupsionit, ambasadori Lu ka zgjedhur në mënyrë diplomatike për t’iu përgjigjur ish-kryeministrit Sali Berisha sa i takon opinionit të Komisionit të Venecias.
Duke u shprehur se është dakord me ato që Berisha thotë lidhur me vlerësimet e bëra nga Komisioni, Lu i kujton ish-kryeministrit një deklaratë që ky i fundit ka bërë më herët lidhur me rëndësinë e opinionit të shprehur nga “Venecia”.
“Jam dakord me Berishën i cili ka thënë para disa kohësh se, opinioni i Komisionit të Venecias ofron një bazë solide për t’i dhënë vendit një reformë të drejtësisë në nivelin e duhur. Të gjitha forcat politike duhet të mbështesin këshillën e urtë të Presidentit të Komisionit të Venecias”, tha ambasadori Lu.
Më tej, kreu i delegacionit amerikan në vendin tonë, u ndal tek institucionet kyçe të cilët do të mundësojnë realizimin e kësaj reforme. Sakaq, ambasadori Lu theksoi se është populli shqiptar ai i cili duhet të ndjekë me vëmendje ecurinë e realizimit të kësaj reforme.
“Gjatë këtyre tre ditëve kemi dëgjuar sesi është luftuar korrupsioni në tre vende të rajonit, dhe kjo nuk u arrit as nga të huajt dhe as nga politikanët. Edhe në Shqipëri duhet të gjendet rruga sesi duhet të luftohet korrupsioni lartë. Kjo nis nga vettingu, me realizimin e saj. Dhe ky proces duhet të nisë me fillimin e 2017.
KLP duhet të zgjedhjet prokurorët e SPAK. Prokurorët e SPAK do të zgjedhin drejtorin e PKH. Është bërë shumë kujdes për të ndërtuar një sistem që është i pavarur, dhe i izoluar nga trysnitë politike. Kjo do të kërkojë që populli shqiptar ta ndjekë me shumë kujdes këtë proces, në mënyrë që asnjë prokuror dhe asnjë gjyqtar i vetëm dhe mos mundë të manipulojë realizimin e këtij procesi. Shpreh vlerësimet ndaj Komisionit të Venecias për mbështetjen e ofruar, dhe angazhimin për realizimin e kësaj reforme.
Jam dakord me Berishën i cili ka thënë para disa kohësh së opinioni i Komisionit të Venecias ofron një bazë solide për t’i dhënë vendit një reformë të drejtësisë. Të gjitha forcat politike duhet të mbështesin këshillën e urtë të Presidentit të Komisionit të Venecias.
Përgjegjësia për të luftuar korrupsionin i takon popullit shqiptar, shoqërisë civile dhe gazetarëve. Kam besim në zgjuarsinë e popullit shqiptar, ai është i lodhur nga korrupsioni”, u shpreh ambasadori Lu.