Po citoj tre deklarime të bëra prej Kryeministrit Sali Berisha, prej Presidentit të Republikës Bujar Nishani dhe prej Presidentes së Kosovës Ahtifete Jahjaga, ditën që mbreti ikanak Ahmet Zogollin e kthyen në Shqipëri si skelet në valixhe, pas mbi 73 vitesh, që prej 7 prillit 1939, ditës kur me gruan, djalin, motrat, oborrin mbretëror dhe valixhet e thesarit shqiptar, ia mbathi nga atdheu, pa hedhur asnjë pushkë mbi pushtuesin fashist:
1. Bujar Nishani: “Sot në prag të 100- vjetorit të Pavarësisë, është gjest fisnik, detyrim moral dhe patriotik që eshtrat e Ahmet Zogut, këtij patrioti e shqiptari të madh, të prehen në vendin, të cilit ai i kushtoi vitet më të mira të jetës së tij.
2. Sali Berisha: Kthimi i eshtrave të mbretit Zog në Atdhe, janë një nder për çdo shqiptar dhe një nderim për figurën e madhe patriotike e atdhetare të Ahmet Zogut, këtij shqiptari që bëri histori për bashkimin e shqiptarëve, për pavarësinë dhe lirinë e atdheut, për mbrojtjen e trojeve shqiptare nga të huajt…
3. Ahtifete Jahjaga: Eshtrat e patriotëve nuk i tret dheu i huaj dhe guri i rëndë peshon në vendin e vet, ndaj ndihem e nderuar, që sot jam prezente në këtë ceremoni të kthimit të eshtrave mbretit patriot e atdhedashës Ahmet Zogu, në Atdheun e tij, për të cilin luftoi dhe përkushtoi gjithçka deri në fundin të jetës së tij. Të tre shtetarët e lartë të kombit shqiptar, janë në një vijë “melodike”: nderojnë Ahmet Zogun, e deklarojnë dhe e shpallin atë “atdhetar, “patriot:, luftëtar e prijës të shquar të luftërave për liri” etj., etj.. Në fakt, ky “nderim” zyrtar i ish- mbretit Zog, po bëhet privatisht që prej 1 viti dhe veçanërisht tre muajt e fundit, prej Kryeministri Sali Berisha. Tashmë Ahmet Zogu e ka një “emër” të cilin ia ka vendosur vetes, kur ia mbathi në 7 prill 1939, ditën kur Shqipëria u sulmua nga Italia fashiste. Ky emër është “TRADHËTAR”. Kryeministri Sali Berisha, natyrisht për interesa të tij e të atyre që e urdhërojnë nga jashtë kufijve veriorë të Shqipërisë, po rropatet për t’ia hequr Ahmet Zogut damkën e stamposur historikisht si “tradhtar”, si “anti-shqiptar”, si “shitës i trojeve shqiptare tek serbët”, si “vrasës i patriotëve shqiptarë”, si “despot”, si “kryeministër e mbret, që e la vendin në gjendje shoqërore dhe ekonomike mesjetare”, si “kryeministër e mbret, që pranoi dhe realizoi me pazare të pista pushtimin e Shqipërisë në vitin 1939”, si “mbret që ia mbathi si lepur, duke braktisur vendin përballë pushtimit”. Kryeministri Sali Berisha dhe “bordero e kolltukë historianët” e pushtetit të tj, po vazhdojnë ta glorifikojnë TRADHËTARIN Ahmet Zogu, si “figurë të madhe historike të shtetit shqiptar” dhe si “atdhetar të madh e të shquar të kombit”. Kësaj “melodie” komike e të qëllimshme pro-serbe të Sali Berishës për të konvertuar tradhtinë dhe anti-shqiptarizmin e Ahmet Zogut në “patriotizëm, atdhetarizëm e shqiptarizëm të madh”, iu bashkua edhe Presidenti i Republikës së Shqipërisë Bujar Nishani, edhe Presidentja e Kosovës Ahtifete Jahjaga, duke përdhosur faktet e dokumentuara historike të anti-shqiptarizmit, të tradhtisë dhe shërbesave pro-serbe të Ahmet Xhemal Zogut. “Historiani” Sali Berisha, po trumbeton me histeri se ish-mbreti Zog është “maja e atdhetarizmit”, kur në fakt me dokumente fakte historike është damkosur” si tradhtar, si antishqiptar, si copëtues dhe shitës i trojeve të vendit, si vrasës i patriotëve të shquar të kombit, që luftonin për lirinë dhe trojet e vendit. Kamë disa pyetje për “trion” Berisha, Nishani, Jahjaga, që kërkon të pastroj “profilin e tradhtarit e anti-shqiptarit Ahmet Zogut:
– Nëse nuk quhet “tradhtar”, çfarë mund të quhet një mbret, që braktis vendin kur ai sulmohet ushtarakisht?
– A mund të quhet “atdhetar”, një mbret që ia mbath nga fronti i luftës për mbrojtjen e atdheut, kur mbreti edhe në sundimin e Zogut, quhej “komandant i përgjithshëm i forcave të armatosura kombëtare, që drejton e udhëheq ushtrinë dhe popullin në çdo rast sulmi ushtarak që bëhet nga një vend tjetër, duke qëndruar deri në vdekje, në frontin e mbrojtjes së pavarësisë dhe trojeve të vendit”.
– Kur ikën mbreti (komandanti i përgjithshëm) nga lufta: Pa nisur ajo, në mes të luftës, apo kur lufta humbet ose fitohet?! Sepse me sa di unë edhe në lojën e shahut, mbreti dorëzohet i fundit?
– Çfarë është kjo IKJE hajdutçe dhe duke vjedhur thesarin e shtetit: Atdhetari, apo tradhti?
– A mund të nderohet e të ngrihet në piedestal një mbret, që ka vrarë me porosi të serbëve patriotët e shquar shqiptar Bajram Curri, Avni Rustemi, Hasan Prishtina etj., etj., të cilët luftonin për mbrojtjen e trojeve shqiptare nga copëtimi serb?
– A mund të nderohet e të ngrihet në piedestal një mbret, i cili ka copëtuar trojet shqiptare dhe ia ka bërë dhuratë serbëve?
Duke mos vazhduar të komentojmë asnjë “shkronjë” nga lëvdatat e treshes Berisha, Nishani, Jahjaga bërë publikisht për mbretin e vet-klonuar, kriminel ordiner e politik, hajdut, anti-shqiptar e tradhtar Ahmet Zogu, por po të sjellim në kujtesë, një poezi të të madhit Ali Asllani, kushtuar “mbret-lepurit” shqiptar të 7 prillit 1939, Ahmet Zogu, këtij “patrioti e atdhetari të shquar”, që ia mbathi nga Shqipëria ditën kur ajo po pushtohej, ndërkohë që si “mbret i shqiptarëve” (siç vet-deklarohej), duhej të ishte në krye të luftës për mbrojtjen e lirisë dhe pavarësisë së vendit. Ju treshes Berisha, Nishani, Jahjaga që nuk e cilësoni Ahmet Zogun si “tradhtar anti-shqiptar”, po ju kujtoj “Himnin Kombëtar Shqiptar”, i cili e përcakton qartë se kush quhet “TRADHËTAR I SHQIPËRISË”, i shkruajtur nga Asdreni që në vitin 1908 dhe i njohur, ligjësuar, i shpallur dhe i kënduar si i tillë prej shqiptarëve, që prej ditës së Shpalljes së Pavarësisë në 28 Nëntor 1912, pra 27 vjet përpara se Ahmet Zogu i vet-shpallur mbret, braktisi atdheun e popullin e ia mbathi si frikacak përballë detyrimit për mbrojtjen e atdheut nga pushtimi! Besoj, se ju treshja Berisha, Nishani, Jahjaga e keni lexuar dhe e kenë kënduar shumë herë “Himnin Kombëtar” si fatosa, si pionierë, si nxënës, si studentë, si deputetë, si politikanë, si ministra, kryeministra, si presidentë dhe si… shqiptar?! Madje e kënduat dhe atë ditë 17 nëntori 2012, kur tradhtarin dhe anti-shqiptarin Ahmet Zogu e quanit “Atdhetar të shquar të kombit”, kur e mbuluat me flamur kombëtar dhe e dekoruat me “Urdhrin e Flamurit”. Por nuk e di se si jeni ndjerë ju treshja Berisha, Nishani, Jahjaga, kur përballë skeletit të njeriut që ia mbathi kur atdheu pushtohej në 7 prill 1939, këndonit këto vargje të “Himnit Kombëtar”:
Prej lufte veç ai largohet
Që është lindur tradhëtor
Kush është burrë nuk frikësohet
Por vdes, por vdes si një dëshmor!