Ish kryetari i KQZ-së Çlirim Gjata: Ja se çfarë ndodh tani me listat e kandidatëve për deputetë
Që dje, zyrtarisht, parlamenti ynë nuk ka 140 deputetë, por 79 deputetë, pasi deputetët e opozitës i kanë dorëzuar mandatet e tyre.
Pyetja është: A do të zëvendësohen këto mandate, derisa edhe kandidatët e tjerë në partive parlamentare kanë firmosur dokumentin që nuk do të marrin mandatet e deputetëve dhe nga cila listë e partive, do të plotësohen, nëse e lejon Kodi Zgjedhor, për më tepër, që zgjedhjet parlamentare të 2017 u bënë pa koalicione zgjedhore?
Çlirim Gjata, ish kryetari i KQZ-së përgjigjet: KQZ bën kërkesën për zëvendësimin brenda 30 ditëve me emrat që vijnë pas tyre në listë, kjo është procedura, por ka ndodhur që komplet opozita në bllok u largua nga Parlamenti. Lista është politike dhe janë persona politikë. Edhe këta të dytët i kanë dërguar KQZ-së një letër secili ku shprehen se nuk duan ta marrin mandatin. Nëse mbaron lista e Partisë Demokratike, mbaron gjithçka, sepse në zgjedhjet e fundit partitë janë futur vetëm, nuk ka pasur koalicione. Duke u regjistruar lista e tyre dhe duke mos pasur koalicione nuk ka asnjë zgjidhje tjetër”, – deklaroi Çlirim Gjata. Ai tërhoqi vëmendjen edhe ndaj ambasadorit francez për deklaratat e bëra nga ky i fundit për mos djegien e mandateve dhe zhvillimin e protestave paqësore duke thënë, se ai duhet të marrë parasysh protestat masive që po ndodhin në Paris ku prej muajsh qyteti është në kaos “E tha edhe Basha sot se ndërkombëtarët duhet të kenë parasysh se kush i qeveris ata dhe çdo të bënte populli, nëse do të qeveriseshin nga një qeveri e tillë që vjedh votat”.
