Fakte të reja për dosjen e radarëve. Çfarë ndodhi me largimin e gjigantit amerikan “Lockheed Martin” dhe si ndaheshin tenderët në Ministrinë e Mbrojtjes
Xhemal Gjunkshi, ish-shef i Shtabit të Përgjithshëm të Forcave të Armatosura, ka akuzuar publikisht ish-ministren e Mbrojtjes, Mimi Kodheli për cenim të sigurisë kombëtare, duke lënë jashtë funksionimit radarët detarë dhe duke i hapur rrugë trafikut të drogës. Në një akuzë të gjatë publike, deputeti aktual i PD-së rendit mënyrën e veprimeve në dikasterin e drejtuar për 4 vjet nga Kodheli, si u largua kompania amerikane “Lockheed Martin” dhe si ndaheshin tenderët e fondet publike.
Deklarata e plotë
“Përjashtimi i gjigantit të teknologjisë globale amerikane “Lockheed Martin”, në mirëmbajtjen e sistemit të radarëve cenoi rëndë sigurinë kombëtare dhe ktheu detin Adriatik në autostradë të drogës dhe kanabizimit të Shqipërisë. Deklarimi i ish-ministres së Mbrojtjes, Mimi Kodheli, për gjendjen e sistemit kur mori detyrën e saj është një “mashtrim“ spekulativ i vijueshëm i kësaj ish-ministre të dështuar si asnjë Ministër Mbrojtje më parë. Sistemi i radarëve ka pasur defektim të dy radarëve gjatë vitit 2012. Deri në muajin maj të vitit 2013 kanë qenë në gjendje pune operacionale pjesërisht katër radarë, por sistemi nuk ka qenë kurrë jashtë funksionit “operacional“, pasi funksiononin nënsisteme dhe mjete të tjera evidentimi-zbulimi të hapësirës detare shqiptare.
Anulimi skandaloz, antiligjor dhe korruptiv i procedurës së prokuruar dhe miratuar nga ish-ministri i Mbrojtjes, prokuruar më 11.06.2013 dhe shpallur fitues firma “R&T” Sh.p.k me fondin financiar 56.669.192 lekë pa TVSH (pra fond më pak në vlerë, se fondi i “Rilindjes”), personalisht nga Ministrja e re në detyrë, por e “kalitur për normën 20% të fitimit“ në Bashkinë e Tiranës Znj. Mimi Kodheli, sipas Urdhrit Nr.1861, datë 01.10.2013, me argumentimin (përsëri mashtrues), për “mungesë të fondit limit“ vërtetojnë përsëri sot përzgjedhjen klienteliste të firmës IDEA TEL sh.p.k., firmë të cilën ne e përjashtuam nga procedura për shkak të shkeljeve dhe abuzimeve të aprovuara gjatë garës së tenderit dhe procesit të zbatimit të kontratës së mirëmbajtjes të sistemit në vitin 2011. Mbështetur në gjendjen “tekniko-operacionale“ të SIVHD-së dhe “ndryshimeve“ skandaloze-kooruptive të softwerit, që menaxhonte sistemin jashtë çdo “normë sigurie”, që prej muajit korrik 2015 e deri më sot, Ju akuzoj publikisht se:
1 – Studimi i hartuar për “mirëmbajtjen e sistemit” të SIVHD-së, procedura e prokuruar SIVHD-së (nga Drejtorët, Gjeneralët, Sekretari personal dhe Ju – për të njëjtën proces, e firmosur në dy forma të ndryshme, brenda vitit), lidhja e kontratës si edhe procesi i zbatimit të saj deri sot është jashtë çdo “norme ligjshmërie“ dhe fakton një shpërdorim të vlerave financiare në nivele “miliarda lekësh – 1.156 miliard lekë vetëm për një vit kalendarik). Krahasuar me praktika të mëparshme, e ke shkatërruar përfundimisht atë, duke mos garantuar vijimësi “operacionaliteti“ të sistemit, por vetëm rrugë të lirë të drogës dhe terrorizmit drejt Evropës dhe vendeve partnere të NATO-së, duke cenuar sigurinë e jetës së njerëzve dhe teknikës në hapësirën detare dhe në veçanti cenimin e sigurisë kombëtare.
Ministria e Mbrojtjes ka prokuruar dhe firmosur kontratën me firmën shqiptare me një kosto 5 herë më të lartë se me firmën amerikane. Fondi financiar i kontratës në vite për mirëmbajtjen teknike të sistemit me firmën amerikane “Lockheed Martin Global Incorporated“ – SHBA” gjatë vitit 2010 ishte 250.000 USD total, nga ku ishin planifikuar dhe u blenë 70.460 USD pjesë rezervë, të cilat shërbyen për mirëmbajtjen e sistemit deri në shkurt të vitit 2014.
2 – Përjashtimi skandaloz, me vetëdijen 100 % Tuajën dhe të Sekretarit tënd, i partnerit më strategjik – firmës globale amerikane “Lockheed Martin Global Incorporated USA” (firma që ka dizenjuar, implementuar dhe mirëmbajtur këtë sistem) nga procesi i “mirëmbajtjes/modernizimit të sistemit”, duke thyer me vetëdije dhe flagrancë të gjitha VKM-të, marrëveshjet midis KM/MM-së dhe firmës amerikane, përbën një shkelje “skandaloze-cinike” të normave dhe protokolleve të “bashkëpunimeve strategjike” ndërshtetërore, specifikisht me aleatin tonë strategjik SHBA-në, pavarësisht se Ju morët rekomandime speciale nga KLSH-ja.
3 – Ministria e Mbrojtjes nuk ka realizuar asnjë nga objektivat e paketës të Kapaciteteve të Mbrojtjes (CT – M 7204N – shkëmbimin e informacionit detar, me partnerët e vendeve të NATO-së, etj.), nuk ke përmbushur asnjë standard ndërkombëtar të BE-së dhe NATO-së.
4 – Forcat e Armatosura zotërojnë të gjitha kapacitetet teknike, njerëzore dhe strukturore që të realizojnë vetë mirëmbajtjen e sistemit, sepse firma LMGI-SHBA ka trajnuar stafin teknik të SIVHD-së. Pikërisht ky staf ka siguruar mirëmbajtjen e komplet sistemit në të gjithë periudhat e pa prokuruar si në vitin 2012, 2013, 2014 deri në momentin që kanë konsumuar komplet pjesët e dedikuara rezervë që gjenden në depon e QVD-së. Pra Forcat e Armatosura, KFD-ja duhet të sigurojnë vetëm blerjen e pjesëve rezervë për sistemin, duke eleminuar shpenzimet financiare tepër abuzuese.
5 – Personeli ushtarak, që të ka rekomanduar apo insistuar në sigurimin dhe lidhjen e një kontrate shërbimi mirëmbajtje afatgjatë të sistemit (software dhe hardware) me firmën “Lockheed Martin Global Incorporated“ – SHBA”, janë shmangur nga pozicionet e tyre drejtues dhe janë përndjekur fatalisht në karrierën e tyre ushtarake.
6 – Nuk ke mundur të sigurosh vend – “depo” për pjesët dhe pajisjet rezervë më të domosdoshme të parashikuara në kontratë për riparime emergjente të sistemit (76 shtatëdhjetë e gjashtë artikuj), pro ja ke lënë në dorë privatit, (abuzuesit, shpërdoruesit, dhunuesit) duke shënuar një rekord menaxhues katastrofik antiligjor.
7 – Firma nuk ka realizuar në kohë (me lejen tënde) ndërtimin e sistemit Back-up të Softit të Menaxhimit të Trafikut Detar, Ju bëjmë me dije se: Sistemi i back-up duhej të ishte realizuar nga shoqëria ”Idea Tel”, brenda 120 ditëve kalendarike nga hyrja në fuqi e kontratës dhe e instaluar në të gjitha Site-et e SIVHD-së, por vazhdon edhe sot të mos jetë realizuar.
PSE!
8 – Lejimi i shoqërisë “Idea Tel” sh.p.k. Tiranë, të instalojë në çdo SITE të SIVHD-së kamera vëzhgimi për ruajtjen e shelterave dhe pajisjeve të SIVHD-së, kur ky proces nuk është parashikuar në kontratën e shërbimit, si edhe lejimin e instalimit të serverit të kamerave tek kompania private, është cenim i rëndë edhe flagrant i normave më elementare të sigurisë dhe të ruajtjes së informacionit.
Ministria Mbrojtjes shkatërroi dhe largoi të gjithë inteligjencën dhe profesionalizmin ushtarak, largoi të gjithë profesorët, ka pasur numrin më të lartë të larguarve nga ushtria, mbylli kurset e Doktoraturave, shkatërroj Reparte të tëra, fali prona pa hesap, nuk realizoi asnjë rritje financiare apo trajtim për ushtarakët, asnjë premtim të shprehur nuk mbajti, shpërbleu të paaftët, regjistruesit e chateve, abuzoi me tenderët e mbyllur – çdo tender shkoj tek FastTech dhe Idea Tel-i, aplikoi stilin e gradimeve mbi politizimin ekstrem të FA-së në kundërshtim me ligjin. U kthye vetëm në një roje postblloku të Ministrisë, detyrë të cilën e ka kryer me shumë përkushtim.
Grupi i megakorrupsionit në Ministrinë e Mimit drejt Byrosë Kombëtare të Hetimit”.
Xhemal Gjunkshi
