Në 23 vjet tranzicion, në qoftë se ka sektor nga më jetikët për Shqipërinë dhe shqiptarët që ka marrë goditje vdekjeprurëse, ka qenë mjedisi. Dhe kjo goditje mjedisit i ka nisur nga ndërtimet e paligjshme që numërohen me mijëra në zonat bregdetare qytete dhe deri në ato rurale, e deri tek derdhja e pakontrolluar e mbeturinave organike dhe helmeve nga kompani private dhe ndërmarrje të tjera prodhuese. Një kaos i paparë, që ka shpërfytyruar afro 90 përqind të territorit të vendit. Ekspertët së fundi kanë deklaruar, bazuar edhe në statistikat e fundit zyrtare se, në Shqipëri ka afro 31 pika të “nxehta” mjedisore që kanë nevojë urgjente për ndërhyrje me investime. Kjo konsiston në faktin e thjeshtë, të pastrimit total të këtyre 31 zonave të kontaminuara, ku vetëm 4 prej tyre ndodhen në Tiranë. Përjashtim nuk bëjnë edhe qytete të tjera madje edhe ato bregdetare. Këtë fakt tronditës të mbajtur për 8 vjet sekret e ka zbuluar Ministri i ri i Mjedisit zoti Lefter Koka. Kurajo qytetare dhe impenjimi intelektual i zotit Koka bënë të mundur të mësojmë fakte vërtetë tronditëse lidhur me mjedisin, i cili është burimi jetësor nga ne ushqehemi, dhe kemi kontaktet e përditshme. Ardhja e zotit Lefter Koka në krye të Ministrisë së Mjedisit ka sjellë tjetër impuls në ecurinë dhe drejtimin e strukturave të këtij dikasteri. Duket se eksperienca e tij si në drejtimin e bashkisë së Durrësit, por edhe ndërmarrjeve të tjera biznesi, ka bërë që Ministria e Mjedisit të nisë realisht misionin dhe realizimin e qëllimit të saj. Ajo sot është ndër dikasteret më të rëndësishme të garantimit të një jete të shëndetshme për popullatën e komunave dhe bashkive. Ardhja e zotit Koka, e ka shpërgjumur Ministrinë e Mjedisit, dhe ka vënë në pozita pune strukturat dikur parazite. Nga ardhja në detyrë si ministër, zoti Lefter Koka vendosi dhe realizoi me sukses zbatimin e ligjit në aksionin e prishjes së 120 objekteve pa leje në Krujën turistike, të kthyera në furra gëlqereje, dhe që prej afro 10 vitesh ndotnin gjithë zonën. Ministri Koka mbetet i vendosur të zbatojë ligjin, duke i shpallur luftë pa kompromis antiligjit, duke mos kursyer asnjë objekt që deri tani ka ndotur ajrin, tokën, banesat, lumenjtë, detin, pyjet, rrugët, dhe jetën e qytetarit. Ministria e Mjedisit, e cila deri para pak kohësh vetëm e tillë nuk mund të quhej, tashmë ka misionin e saj, ka projektet e saj, ka stafin e saj të përkushtuar ndaj detyrës, ka impenjimin për të realizuar objektivat dhe premtimet e qeverisë. Shqipëria sot ka shumë nevojë për mjedis të pastër, dhe kjo gjë do të realizohet duke zbatuar kuadrin ligjor dhe duke vendosur para ligjit personat që kanë sjellë këtë katrahurë, e cila ka prishur jo vetëm kushtet jetësore të shqiptarëve, por edhe imazhin e vendit tonë në axhendat e turistëve të huaj. Një mjedis i kontaminuar, padyshim që ka larguar turistët e huaj. Si mund të vërshonin turistët e huaj, në një Shqipëri me 31 vatra të rrezikshme mjedisore? Apo më keq akoma, kur ish-ministri Mjedisit Fatmir Mediu në çdo deklaratë zyrtare, kur ishte në detyrë, përmendte investime, realizime dhe premtime që dëgjonte live nga shefi i tij në mbledhjet e KM. Ministria e Mjedisit prej 8 vitesh ishte kthyer në strehë militantësh, me administratë të paaftë, të lodhur dhe të korruptuar. Por më skandalozja ishte se, asaj administrate i mungonte edhe informacioni më banal, që lidhej me nivelin e ndotjes fjala vjen të uzinave të çelikut në Elbasan, apo të fabrikave të çimentove. Ndjesia e popullatës ndaj mjedisit mbetet në shkallën më të lartë, dhe kjo u zbulua qartë në protestat mbarëkombëtare për ti thënë “JO” armëve kimike nga Siria. Publikimi i një tjetër fakti tronditës për 31 zonat e ndotura mjedisore sërish ka sjellë ndjesi popullore, por edhe habi shokuese. Bëhet fjalë për jetën dhe shëndetin e popullatës. Më e pakta që mund të bëjë Ministria e Mjedisit është dërgimi para përgjegjësisë ligjore të ish-ministri Mediu, që ka fshehur këto fakte tronditëse. Ka ardhur koha që çdo ish-ministër, ish-zv/ministër, ish-drejtor drejtorie, apo zyrtar tjetër që ka shkelur ligjin, ka abuzuar me paratë e shtetit ka dëmtuar jetën e shqiptarëve, dhe bizneset e tyre, që nuk ka realizuar projektet dhe premtimet, por ka mashtruar, të përgjigjet para ligjit. Atë ç’ka shqiptarët nuk e kanë vlerësuar sa duhet deri tani, mjedisin e tyre, tokën, ajrin, lumin, pyllin, detin, këtej e tutje do ta kenë të shenjtë. Opinioni publik ka vlerësuar me tone pozitive, aksionet e Ministrisë së Mjedisit në shkallë vendi, dhe shikon me optimizëm të ardhmen, duke besuar se kjo qeveri, dhe ky ministër i Mjedisit do të mbajnë premtimet dhe do të realizojnë projektet për një Shqipëri të Pastër. Lefter Koka i ka dhënë provat e para, dhe kanë rezultuar të suksesshme, ndaj na mbetet të themi se, Mjedisi Shqiptar ka gjetur së fundi, njeriun e duhur për ta drejtuar, me energji, vitalitet dhe vizion europian.
