Shtëpia e Bardhë njoftoi se në udhëtimin e tij të parë në mandatin e dytë, Presidenti Barak Obama do të vizitojë këtë javë Lindjen e Mesme, me ndalesa në Izrael, Bregun Perëndimor dhe në Jordani. Shtëpia e Bardhë tha se, vizita në atë pjesë të botës është një rast i rëndësishëm për tu takuar me udhëheqjen e re të Izraelit dhe për t’iu drejtuar popullit izraelit me një fjalim, si edhe për të zhvilluar bisedime dhe takime me udhëheqësit dhe popullin palestinez, me Mbretin e Jordanisë dhe me qytetarët e kësaj mbretërie.
Zëvendës Këshilltari për Komunikimet Strategjike të Këshillit Kombëtar, Zoti Ben Rhodes komentoi vizitën e Presidentit amerikan në Lindjen e Mesme si dhe disa prej çështjeve mbi të cilat Zoti Obama do të zhvillojë bisedime gjatë takimeve të tij. Ai tha në një video mesazh se Presidenti Obama, me të arritur në Izrael të Mërkurën, do të takohet me Presidentin e atij vendi Zotin Shimon Perez dhe me Kryeministrin Netanjahu me të cilët, sipas zëdhënësit të Shtëpisë së Bardhë ai do të bisedojë mbi një sërë çështjesh, përfshirë gjendjen në Siri dhe në Iran. Pas vizitës me udhëheqësit izraelitë, sipas Shtëpisë së Bardhë, Presidenti Obama do të shkojë në qytetin Ramallah ku do të takohet me Presidentin Abas të Autoritetit Palestinez, me qëllim për të ritheksuar përkrahjen amerikane ndaj aspiratave palestineze për një shtet të vetin krah për krah me shtetin e Izraelit.
Por, Shtëpia e Bardhë e ka bërë të qartë nëpërmjet zëdhënësve të saj, se presidenti Obama nuk është duke sjellë ndonjë plan të ri për paqe në Lindjen e Mesme, ndonëse qëllimi i vërtetë i vizitës së tij në atë rajon, sipas tyre, është që të komunikojë drejtpërsëdrejti me popujt izraelitë, jordanezë dhe palestinezë mbi të ardhmen që dëshirojmë të ndërtojmë së bashku në atë rajon, sipas zyrtarit të Shtëpisë së Bardhë, Zotit Ben Rhodes. Pas qëndrimit të tij në Izrael, Presidenti Obama do të vizitojë Jordaninë ku do të ketë mundësi të takohet me Mbretin Abdullah, me të cilin do të diskutojë reformat politike që Mbreti ka ndërmarrë tanimë në Jordani. Gjatë vizitës së presidentit amerikan në Aman, udhëheqësit e të dy vendeve do të diskutojnë gjithashtu edhe sfidat me të cilat përballet i gjithë rajoni, përfshirë edhe gjendjen e refugjatëve sirianë, ndërkohë që vetëm në Jordani janë strehuar nja 400.000, ku kanë kërkuar mbështetje dhe ndihma humanitare, si dhe angazhimin e vazhdueshëm amerikan për një të ardhme më të mirë me një demokraci më të madhe dhe për paqe në atë rajon, përfundoi ndihmës këshilltari i Shtëpisë së Bardhë për çështje të sigurimit kombëtar, Zoti Ben Rhodes.
Javën e kaluar, Presidenti Obama u takua veças me një grup udhëheqësish arabo-amerikanë si dhe me udhëheqës të organizatave pro-izraelite në Amerikë për të dëgjuar pikëpamjet e tyre në lidhje me gjendjen në Lindjen e Mesme, para se të udhëtonte në atë rajon plot turbullira. Presidenti Obama, u tha udhëheqësve të organizatave pro-izraelite, se gjatë kësaj vizite ai nuk do të sjellë ndonjë propozim të ri për paqe megjithëse në fillim të mandatit të tij kishte premtuar se diplomacia për paqe në Lindjen e Mesme do të ishte një prej përparësive të tij kryesore. Mirëpo, ai u tha atyre se çështja bërthamore e Iranit dhe lufta civile në Siri pritet që të jenë në rendin e ditës.
Ndërkaq, udhëheqësit e organizatave arabo-amerikane, të cilët në të kaluarën e kanë kritikuar Presidentin Obama se nuk ka bërë mjaft për kauzën palestineze, pas takimit me të në Shtëpinë e Bardhë, u shprehën për median se nga takimi, ”kishin mbetur të kënaqur pasi atyre iu dha rasti që t’i paraqisnin shefit të Shtëpisë së Bardhë rekomandimet e tyre si edhe mesazhet që ai duhet t’i paraqesë popullit palestinez gjatë vizitës së tij”. Në deklaratën e tyre për shtyp ata thanë se, ”nëpërmjet angazhimit të vazhdueshëm, të balancuar dhe konstruktiv, Shtetet e Bashkuara mund të ndërmjetësojnë arritjen e një zgjidhjeje të përhershme të konfliktit izraelito-palestineze.”
Administrata amerikane e ka bërë të qartë dhe e ka theksuar disa herë gjatë javës së kaluar se vizita e Presidentit Obama në Lindjen e Mesme nuk ka për qëllim paraqitjen e ndonjë plani për paqe, madje Sekretari amerikan i Shtetit, John Kerry tha se, ”se ne nuk po shkojmë atje për tu dorëzuar palëve ndonjë plan, ose për tu thënë atyre se çfarë duhet të bëjnë. Unë dua të konsultohem”, tha ai, ”dhe presidenti dëshiron të dëgjojë”, pikëpamjet dhe qëndrimet e protagonistëve me të cilët do të takohet gjatë qëndrimit të tij në rajon.
Jo vetëm administrata vetë, por sipas një sondazhi, të ndërmarrë nga firma McClatchly-Marist, as amerikanët në përgjithësi, nuk presin ndonjë përparim ose rezultat të dukshëm nga vizita e Presidentit Obama këtë javë në Lindjen e Mesme, ndërkohë që 65 për qind thonë se vizita e Presidentit amerikan në Lindjen e Mesme nuk do të ndihmojë në rifillimin e negociatave midis Izraelit dhe Palestinezëve. As ekspertët e çështjeve të këtij rajoni nuk presin ndonjë arritje nga vizita e Zotit Obama në atë rajon. Autori i librit, “Udhëkryqi:E ardhmja e Partneritetit Strategjik Amerikano-Izraelit, Haim Malka i Qendrës Për Studime Strategjike dhe Ndërkombëtare me qendër në Uashington u citua nga media të ketë thënë se, “Ky udhëtim ka të bëjë më shumë me menaxhimin e problemeve të Lindjes së Mesme, se sa me zgjidhjen e këtyre problemeve”. Ndërsa analistë të tjerë thonë se administrata Obama me qëllim po i pakëson shanset e ndonjë përparimi të dukshëm gjatë kësaj vizite, me qëllim që në qoftë se me të vërtetë shënohet madje edhe suksesi më i vogël, administrate mund të marrë kredi për një arritje madje edhe në kundërshtim me sa pritej.
*Ish-Drejtor i VOA-s për Euro-Azinë
