Frank SHKRELI/ Greqia, vend i keq për refugjatët

82

Këtë javë, Organizata Ndërkombëtare e të Drejtave të Njeriut, Amnesty International (AI) kritikoi Greqinë për mënyrën se si ajo sillet me refugjatët politikë, të cilët përpiqen të hyjnë në vendet e Bashkimit Europian nëpërmjet Greqisë.  Amnesty International i kërkoi Athinës zyrtare që, azilkërkuesve nga vendet që janë prekur nga lufta, siç është Siria, t’u garantojë sigurinë gjatë qëndrimit të tyre në territorin grek. Amnesty International përmend rastin e refugjatëve sirianë, të cilët kanë humbur jetën kohët e fundit, në përpjekje për të hyrë në territorin grek, nëpërmjet ishullit Lesvos.  Në deklaratën e saj, AI thotë se, autoritetet greke kanë gjetur trupat e gjashtë sirianëve të vdekur, përfshirë edhe trupin e një 17-vjeçareje shtatzënë dhe të një nëne me tre fëmijët e saj të mitur. Organizata e të Drejtave të Njeriut thotë se, kjo nuk është hera e parë që azilkërkuesit humbin jetën, duke u përpjekur të hyjnë në Europë nëpërmjet Greqisë.

“Ndërsa Greqia po shton kontrollet në Euros”, për të ndaluar hyrjen e refugjatëve në territorin e saj, “azilkërkuesit janë duke u përpjekur të gjejnë rrugë të tjera”,- tha John Dalhuisen, Drejtor i AI për Europën dhe Azinë Qendrore.

Në deklaratën e saj drejtuar autoriteteve në Athinë, Amnesty International thotë se: “Është jetike që autoritetet greke të bëjnë çdo gjë të mundur për të garantuar sigurinë e refugjatëve politikë”, duke shtuar se, sistemi grek për azilkërkuesit nuk i përkrah ata aspak” dhe shton se, “refugjatët politikë, përfshirë sirianët dhe afganët, që arrijnë në brigjet e Lesvos mbahen në qendra të policisë, në kushte tepër mizore dhe shpesh lihen të flenë nëpër rrugë”.  Amnesty International bën thirrje që, “Autoritetet greke të ndërmarrin masa urgjente për përmirësimin e kushteve për ata që mbërrijnë në brigjet e territorit grek dhe t’i japin fund mbajtjes në arrest të azilkërkuesve.  Azilkërkuesit sirianë pa dokumente, të cilët janë larguar nga konflikti në vendin e tyre, të mos mbahen në arrest dhe as të mos dëbohen” dhe njëkohësisht , AI i bën thirrje Athinës që të “ndërmarrë një shqyrtim të drejtë dhe efektiv të kërkesës së tyre për strehim”.

Të ënjtën, deklaratës së Amnesty International iu bashkua edhe organizata bamirëse franceze, “Mjekët pa Kufij”, e cila kritikoi ashpër Greqinë për trajtimin e refugjatëve politikë që janë larguar nga atdheu i tyre i shkatërruar nga lufta duke thënë se, azilkërkuesit trajtohen si emigrantë ilegalë të cilët, sipas kësaj organizate, thuhet se, përballen me masa brutale nga policia greke.  Drejtori i Përgjithshëm i “Mjekëve pa Kufij”, Willem de Jonge i tha agjencisë AFP, se në Greqi, “Ekziston një mungesë e plotë edhe mos vullnet për një përgjigje humanitare dhe solidariteti ndaj azilkërkuesve sirianë, të cilët arrijnë në Greqi nëpërmjet Turqisë.   De Jong i tha AFP-së, se shëndeti i azilkërkuesve, shumë prej të cilëve vuajnë nga tronditje shpirtërore dhe psikologjike, përkeqësohet gjatë qëndrimit të tyre në qendrat, ku mbahen në Greqi.

Azilkërkuesit e shkretë sirianë janë vetëm një prej grupeve etnike jo të dëshiruar dhe të keq trajtuar, përfshirë edhe shqiptarët dhe të cilët njëkohësisht përballen me dhunë në Greqi.

Sipas një organizate tjetër të të drejtave të njeriut, Human Rights Ëatch, (HRË) me qendër në Neë York, “midis një krize ekonomike dhe tensionesh shoqërore në Greqi, imigrantët dhe azil-kërkuesit janë bërë objekt tërbimi e zemërimi ksenofobik” ndaj të huajve.   Human Rights Watch thotë në një artikull të vitit të kaluar se ka dokumentuar përdorimin e dhunës në një numër rastesh e lokalitetesh dhe shton duke thënë se, viktimat përballen gjithashtu me pengesa të mëdha kur të huajt kërkojnë drejtësi pranë organeve kompetente. Në artikullin e kësaj organizate thuhet se, megjithëse, Greqia përballet me presione valësh imigrantësh, nuk ka “asnjë arsye për përdorimin e dhunës mafioze ose për dështimin e policisë, të gjykatave dhe qeverisë greke, për t’u marrë seriozisht me këtë problem”.  Në një raport tjetër të kohëve të fundit për azilkërkuesit sirianë në Europë, Human Rights Watch thekson se, vetëm Gjermania dhe Suedia, të cilat kanë numrin më të madh të kërkesave për strehim, u japin atyre automatikisht njëfarë sigurie e përkrahje, sipas organizatës së të drejtave të njeriut, në Greqi ku gjatë vitit 2011 kanë hyrë pothuaj 10-mijë refugjatë sirianë, vetëm 6 prej tyre kanë siguruar përkrahje në atë vend.

Këtë javë, Amnesty International u bëri thirrje autoriteteve greke që të garantojnë të drejtat dhe sigurinë e azil kërkuesve në territorin helen dhe organizata tjetër, mbrojtëse e të drejtave të njeriut, Human  Rights Watch tha më herët se,“ky qytetërim i vjetër nuk duhet të lejojë veten të kthehet në një dhunë institucionale kundër imigrantëve”.  Në të njëjtën kohë, pasi thuhet se për këtë problem, Greqia ka nevojë për ndihmën e Komunitetit Evropian, i bëhet thirrje edhe Bashkimit Europian që të bëjë më shumë për të garantuar zbatimin dhe mbrojtjen e të drejtave të njeriut për të gjithë ata që përpiqen të hyjnë në Europë nëpërmjet zonës jug-lindore të kontinentit, në kërkim të një jete më të mirë dhe më të sigurt.

Edhe gazeta me shpërndarjen më të madhe në Amerikë, Wall Street Journal, në një artikull të gjatë shkruan për fatin e keq të refugjatëve dhe emigrantëve në Greqi.  Ajo thotë se, “Greqia ka nënshkruar marrëveshjet ndërkombëtare dhe europiane për të grantuar dhe mbrojtur të drejtat e refugjatëve dhe emigrantëve, por nuk e ka bërë këtë me azilkërkuesit sirianë”.

Si një ish-refugjat politik, unë ndiej shumë simpati për gjendjen e refugjatëve të ikur nga diktatura nga çdo kënd i botës dhe mund të them me sinqeritet dhe dhimbje për azilkërkuesit e sotëm, se nuk ka gjë më të vështirë kur gjendesh në një botë të huaj pa përkrahje dhe pa perspektivë për të ardhmen – e në rastin e tyre në Greqi — të përballur edhe me dhunën fizike ndaj tyre dhe nga moskujdesi që ndaj tyre tregojnë institucionet zyrtare të shtetit. Kjo është një gjendje që nuk duhet të tolerohet nga Europa dhe as nga bota e qytetëruar,  në Greqi ose në ndonjë vend tjetër. Nuk duhet harruar se sot, azilkërkuesit janë sirianët, por vite më parë ishin shqiptarët, polakët, hungarezët, çekët e të tjerë azilkërkues në Europë dhe më gjerë.

Frank Shkreli