Është bërë zakon i një propagande banale tashmë që sa herë politika dhe institucionet evropiane na tregojnë qartë dhe prerë se në rrugën tonë plot kthesa dhe pengesa për t’u demokratizuar sadopak kemi mbetur shumë prapa të tjerëve, buritë e saj ia venë fajin Evropës. Na e ka me të keq kurva plakë! Sigurisht këtu mund të ishte thënë se përmblidhen përvoja historike ku janë përballur ëndrra kombëtare me politika qarqesh evropiane që nuk kanë qenë përkrah tyre ose i kanë penguar. Ndërkaq sot, duke u fshehur pas historisë dhe manipuluar atë, pakënaqësia ndaj Evropës që shprehet nga propaganda dhe përfaqëson një pjesë të rëndësishme të qarqeve politiko-financiare-pushtetare të Shqipërisë së sotme, ka dy qëllime:
I pari, të ruajë privilegjet kolektive dhe individuale duke ruajtur pra një pozitë sunduese të privilegjuar nëpërmjet izolimit të Shqipërisë nga Evropa.
I dyti, të fshehë dështimet duke hyrë në një paradoks të pashoq dhe absurd, pra edhe të kërkojë të kapë gjoja parametra evropiane, por edhe të pështyjë në drejtim të Evropës dhe të institucioneve të saj, sa herë prej tyre merr një notë refuzuese dhe plot kritika për atë që pretendohet se është arritur.
Kemi ardhur gati në parametrat propagandistike të “Rrezikut anglo-amerikan për Shqipërinë”. Pra, në kufijtë e paranojës politike. Izolimin tonë ndaj saj, ta shprehim sikur jemi të rrethuar nga armiq të jashtëm, të cilët po nxijnë dhe po diskreditojnë fitoret tona!!! Sigurisht atë që propaganda e qarqeve antieuropiane në Shqipëri po e artikulon ku hapur e ku fshehur, e përvetëson edhe një pjesë e segmenteve të opinionit publik. Pse? Një pjesë prej tyre janë të lidhur me favoret e atyre që quheshin “skllevërit e shtëpisë”, pra që kishin një pozitë më të privilegjuar sesa të tjerët, por përsëri skllevër mbeteshin. Kurse pjesa tjetër shprehin frustracionet tona që të izoluar sikurse na ka lënë nga kultura dhe shoqëria evropiane, kujtojmë se jemi në qendër të botës, pas çdo disfate ose thyerje të ndonjë ëndrre, na duket sikur dikush komploton kundër nesh.
Është zakoni i mbrapsht që për çdo mungesë tënden të akuzosh tjetrin duke e gjetur fajin te ai.
Më e keqja është se ky zakon i mbrapshtë e kjo propagandë e keqe paranojake shfaqet jo vetëm në propagandën politike, por edhe në interpretime që u bëhen ngjarjeve dhe rrethanave edhe në fusha të artit, kulturës, sportit, madje edhe duke përdorur për të manipuluar edhe artistë, sportistë, apo krijues të tjerë, të cilët, edhe ata, jo vetëm janë pa asnjë faj, jo vetëm janë viktima të politikave të mbrapshta të institucioneve, por përdoren edhe si mburoja për të fshehur politika menaxheriale të mbrapshta dhe me plot zona të errëta që meritojnë në kohën e duhur të dalin në dritë. Sukseset dhe talentet individuale të dikujt përdoren si mburoja për trafikun e interesave, për të fshehur pazotësinë, dhe një sërë privilegjesh me paratë publike ose jopublike. Është e turpshme që një korr i tërë propagandistik është ngritur kundër atyre vendeve evropiane apo politikanëve evropianë, të cilët na thonë hapur se ende kemi probleme serioze për të pretenduar që kemi përmbushur parametrat tona të europianizimit për t’u pranuar në BE. Prapa shohim një komplot evropian kundër nesh, ndërkohë që sistemi ynë i drejtësisë është në pikë të hallit, të drejtat qytetare të marra nëpër këmbë, administrata publike e mbushur me militantë, arsimi dhe shkenca në amulli të plotë, etj.
Edhe për kanabizimin e vendit dhe trafikun e lëndëve narkotike fajin e paska Evropa?!
Po për papunësinë? Ja, si në Evropë!
Po për korrupsionin? Ja, si në Evropë, nuk ka korrupsion Evropa?
Po për qytetet që po betonizohen? Ja si qytetet evropiane, a nuk po na vlerësojnë me çmime arkitektët dhe urbanistët evropianë?
Një propagandë e keqe fajëson, Evropën, Perëndimin, presidentin Trump, BE, për çdo paudhësi që kryhet në vendin tonë dhe që nuk ka asnjë lidhje dhe asnjë krahasim me atë që ndodh në Perëndim. Përpara disa javësh kam shkruar se qarqe të ndryshme politike-financiare-mediatike në vend nuk e duan Evropën dhe integrimin evropian të Shqipërisë, janë pra antievropianë dhe antiperëndimorë. Për arsyet që tashmë janë thënë. Prej tyre ka një hipokrizi kur shfaqen gjoja përpjekje të mundimshme për integrimin e Shqipërisë në BE. Evropën dhe Perëndimin e duan thjesht për shoping, turizëm dhe për të çuar fëmijën e tyre për shkollim. Ndofta edhe për të depozituar para në bankat evropiane. Këto qarqe bien në kundërshtim me ato përpjekje të sinqerta të një pjese tjetër pakicë politikanësh dhe elitash financiare, mediatike, kulturore, që e duan vërtet frymëzimin evropian dhe perëndimor të Shqipërisë. Sa herë vjen rasti, ky frymëzim antiperëndimor dhe antieuropian prej njerëzish që as ja kanë haberin e kulturës, historisë dhe qytetërimit evropian, shpërthen hapur dhe infekton masa njerëzish që nuk arrijnë të dallojnë realitetin nga propaganda. Dhe e gjitha kjo ndodh kur masa shqiptarësh emigrojnë në Evropë, pra mirë a keq, e kanë idealin evropian për një jetë më të mirë dhe i besojnë atij. Një shoqëri evropiane, jo vetëm që nuk i ka përbuzur shqiptarët, por për dy dekada i ka pritur, integruar dhe u ka dhënë fije shprese për të jetuar si njerëz.
Përjashtohet ndonjë klub për trukime ndeshjesh? Komplot anglo-amerikan kundër Shqipërisë!
Kapet ndonjë sportist duke përdorur doping? Komplot perëndimor kundër Shqipërisë!
Nuk merret vendi i parë në ndonjë spektakël muzikor, sikurse ngremë në ajër pritshmëritë tona, pavarësisht meritave që kemi? Komplot anglo-amerikan, madje në bashkëpunim me qarqet sioniste, kundër Shqipërisë!
Se çfarë lidhjeje kanë shijet e publikut evropian me politikat e shteteve evropiane një Zot e di! Paranoja shkon drejt absurdit dhe bëhet qesharake! Drama merr përmasat e një komedie! “Morëm jo aq pikë sa donim sepse publiku evropian nuk na do, sepse shqiptarët nuk i duan, sepse fqinjët perëndimorë tregohen komplotistë ndaj Shqipërisë dhe kulturës të saj.” Mjafton të shohësh sa pikë morën vende nordike apo të mirëfillta të krishtera, perëndimore, evropiane, shumë më poshtë prestacionit shqiptar, për t’u bindur që çdo gjë mund të ketë në klasifikim, por jo antishqiptarizëm nga Evropa.
Kush bërtet se na ka rrethuar Evropa?
Shihni përkthimet e autorëve evropianë në shqip, dhe do të konstatoni izolimin tonë letrar.
Shihni sa filma të rinj evropian shfaqen në kinematë dhe televizionet tona dhe do të shihni izolimin tonë në kinematografi.
Shihni sa grupe artistike dhe muzikore vijnë në Shqipëri për koncerte në muaj, dhe do të shihni si na kanë izoluar në muzikë.
Shihni sa universitete evropiane të vërteta, ardhur nga Perëndimi, funksionojnë në Shqipëri, dhe do të shihni izolimin tonë në arsim.
Shihni sa biznese prodhuese evropiane kanë logot e tyre në Shqipëri dhe do të shihni izolimin tonë në sistemin prodhues dhe të shërbimeve nga Evropa.
Antieuropianizmi lokal shitet si komplot evropiano-perëndimor, madje me përmasa sioniste, ndaj Shqipërisë. Gjithçka për t’i shpëlarë trutë popullsisë, opinionit publik të brendshëm, ndërkohë që masa pafund të rinjsh nisen për në Evropë për të rifilluar jetën e tyre atje, e kombi plaket, rrudhet, dobësohet.
