Frank Shkreli/ Një mbështetje historike ndërkombëtare ndaj Lirisë së Fjalës

107

“Liria e të shprehurit dhe liria e shtypit, që janë gur-themeli i demokracisë

Analizë nga Frank Shkreli, ish-Drejtor I VOA-s për Euro-Azinë:

“Reporterët Pa Kufij ”, nënshkruan “Partneritetin Ndërkombëtar mbi Informacionin dhe Demokracinë” me G-7 dhe 20-vende të botës gjatë Asamblesë së Përgjithëshme të OKB. “Nëqoftse vendet demokratike nuk vendosin rregullat, në këtë kohë, janë interesat private dhe diktatorët, ata që do të vendosin për ne”

 

Organizata Ndërkombëtare për Mbrojtjen e Gazetarëve dhe të Lirisë së Fjalës, “Reporterët Pa Kufij”, me qendër në Paris, njofton se, si rezultat i përpjekjeve të saj për të promovuar parimet demokratike dhe lirinë e fjalës në hapësirën e gazetarisë, “online”- 20 vende të botës nënshkruan, javën që kaloi, një marrëveshje mbi lirinë e “Informacionit dhe Demokracinë”, në Nju Jork.

Organizata “Reporterët pa Kufij” kishte siguruar vëmendjen, në mbështetje të lirisë së shtypit dhe fjalës së lirë, të udhëheqësve të vendeve të industrializuara, G-7 që u mbajt kohët e fundit në Francë. Pasi kishte marrë mbështetje për këtë nismë nga udhëheqësit më të lartë botërorë të vendeve të industrializuara G-7, “Reporterët pa Kufij”, kishte vendosur që shqetësimet e veta, mbi gjendjen e keqe të lirisë së fjalës dhe të medias në botë, në përgjithësi, ta paraqisnin edhe në një nivel më të lartë ndërkombëtar, siç është Takimi Vjetor i Asamblesë së Përgjithshme të Kombeve të Bashkuara, i cili posa përfundoi punimet e tij në Nju Jork.

Nja dy javë më parë, përfaqësuesit më të lartë të vendeve anëtare më të industrializuara të botës, e njohur si Organizata G-7, janë takuar në mbledhjen e tyre vjetore në Francë për të biseduar mbi një numër çështjesh botërore, përfshirë diskutimin e udhëheqësve të këtyre vendeve, mbi nismën e quajtur “Partneriteti për Informacionin dhe Demokracinë”, paraqitur nga “Reporterët pa Kufij”. Pas përkrahjes së Presidentit të Francës, Emmanuel Macron të kësaj iniciative, grupi G-7 mbështeti këtë nismë, duke thënë se,Liria e të shprehurit dhe liria e shtypit, që janë gur-themeli i demokracive tona – përparimin e së cilës e kishim konsideruar si të pakthyeshëm dhe të paprekshëm – në të vërtetë, është pikërisht, kjo vlerë demokratike – që po vihet gjithnjë në dyshim dhe po kërcënohet prapë.”

Pasi siguroi mbështetjen për këtë nismë nga grupi G-7 në Paris para dy javësh, organizata “Reporterët Pa Kufij” vendosi që shqetësimet e tyre ndaj keqësimit të lirisë së medias dhe të drejtës së lirisë së fjalës në nivel botëror, t’i paraqisnin në një nivel edhe më të lartë ndërkombëtar, siç ishte takimi vjetor i Asamblesë së Përgjithshme të Kombeve të Bashkuara (OKB), pasi kështu e meritonte serioziteti i gjendjes në të cilën ata e shohin përkeqësimin e lirisë së fjalës anë e mbanë botës.

 

Si përfundim, organizata për mbrojtjen e gazetarëve dhe në mbështetje të fjalës së lirë, “Reporterët Pa Kufij”, njofton në një informacion për median, se fillimisht, për idenë e saj siguroi nënshkrimin e “Partneritetit Ndërkombëtar mbi Informacionin dhe Demokracinë” nga 20-vende të botës, të mbledhura këto ditë në Asamblenë e Përgjithshme të OKB-së në Nju Jork. Kjo organizatë gazetarësh e cilëson si “historike” marrëveshjen ndër-qeveritare në mbështetje të promovimit të parimeve demokratike në arenën publike “online”, një nismë kjo e filluar nga “Reporterët Pa Kufij”.

 

Nisma e propozuar nga “Reporterët Pa Kufij” dhe e nënshkruar nga 20-vende të botës hap tani rrugën për zbatimin e garancive demokratike në hapësirën e informacionit dhe të gazetarisë “online”. Njoftohet se, sipas marrëveshjes, “Partneriteti Ndërkombëtar mbi Informacionin dhe Demokracinë” – i nënshkruar këto ditë në Nju Jork nga 20-vende të ndryshme që ato janë angazhuar se do të promovojnë përdorimin e lajmeve dhe informacionit të lirë, të besueshëm, të gjithanshëm dhe të pavarur “online”. Thuhet, se marrëveshja në fjalë, vendos disa parime demokratike, përfshirë parimet e neutralitetit politik, ideologjik dhe fetar si dhe siguron transparencën për mënyrën se si funksionojnë burimet e lajmeve dhe të informacionit “online”. Sipas marrëveshjes në fjalë, furnizuesit e lajmeve kanë përsipër përgjegjësinë që të furnizojnë publikun me lajme dhe informacion të besueshëm, të një natyre pluraliste, ashtu që të mënjanohet “kaosi informativ” që ekziston tani.

 

Në njoftimin për media të organizatës “Reporterët Pa Kufij”, thuhet gjithashtu se, në apelin drejtuar më shumë se 50-ministrave të jashtëm dhe 20-përfaqësuesve të delegacioneve të tjera në Nju Jork ,të cilët morën pjesë në themelimin e asaj që quhet “Alliance for Multilaterism”, pranë Kombeve të Bashkuara, Sekretari i Përgjithshëm i organizatës “Reporterët Pa Kufij”, Z. Christophe Deloire – u ka thënë atyre se, “Në qoftë se vendet demokratike nuk vendosin rregullat, në këtë interval kohe, janë interesat private dhe diktatorët, ata që do të vendosin për ne. Janë këta – dhe jo parlamentet, ata që deri më tani – kanë vendosur rregullat për hapësirën e informacionit dhe të komunikimit “online”. Kjo është arsyeja, se pse Kemi nevojë të vendosim një sistem të ri garancish demokratike, në përputhje me kohën digjitale, ka përfunduar ai, për përdorimin e përgjegjshëm të hapësirës së shpërndarjes së informacionit dhe komunikimit “online”, në përputhje me parimet demokratike dhe të Lirisë së Fjalës.

 

Pritet që nga gjysma e nëntorit të mblidhet në Paris enti i ri “Forumi për Informacionin dhe Demokracinë”, i cili do të inaugurohet nga një koalicion organizatash të pavarura – detyra e të cilit do të jetë, që të propozojë parimet mbi të cilat mund të bazohen rregullat dhe mënyrat e rekomanduara të funksionimit të shpërndarjes së lajmeve “online”, në përputhje me parimet e Fjalës së Lirë dhe të Demokracisë, përfundon njoftimi i organizatës “Reporterët Pa Kufij”.