Flet për “Telegraf” ish-futbollisti i Tiranës dhe i Kombëtares, ja si e përshkruan situatën e skuadrave në Kategorinë Superiore
Vlerat e merkatos kanë qenë pa nivel, “derbi” Tirana-Partizani do i shërbejë cilësisë
Nga Agron KAJA
Në këndvështrimin e specialistit të futbollit, si e shikoni situatën e skuadrave të Superiores në këtë periudhë përgatitore?
Me aq sa e kam ndjekur ritmikën e zhvillimeve në këtë muaj te skuadrat e Kategorisë Superiore, mendoj se skuadrat kanë bërë lëvizje në merkato, njëherësh edhe përgatitje. Duket sikur ky prag Kampionati i çorienton skuadrat në këtë periudhë, por duhet të jenë të stabilizuara për vazhdimësinë e garës.
Të gjitha skuadrat e Superiores janë deklaruar në merkato, ju si e shikoni aktivizimin e tyre në këtë tregues?
Shikoj se kemi të bëjmë me një merkato të zakonshme, të përvitshme për të gjitha skuadrat e kësaj kategorie. Tirana ka deklaruar blerje cilësore, e më pas saj mendoj se vijnë Flamurtari me Teutën. Por, vlerat e merkatos kanë qenë pa nivel, referuar emrave që janë bërë publikë.
Në këtë periudhë ishin në aktivitet në Evropë 4 skuadra, kanë mbetur 2, do të jetë ngarkesë fizike kjo periudhë për to?
Normalisht, është edhe mirë, por edhe keq kur skuadrat tona paralelisht me përgatitjet e sezonit të ri, luajnë edhe në Evropë. Nëse kanë kontigjentin e plotë, është mirë, por nëse janë të pakompletuara dhe të pa organizuara mirë, do ketë ndikim negativ për to në ecurinë e garës.
Disa skuadra të Superiores kanë kërkuar që të kenë 5 lojtarë të huaj në formacion, ju mendoni se kjo i shërben cilësisë së futbollit shqiptar?
Për mua nuk duket e drejtë, sepse një numër i tillë e varros futbollin shqiptar. Me 5 futbollistë jo shqiptarë në një skuadër, i bie që të shohim kampionat të huaj. Me buxhetet që kanë skuadrat, është e vështirë me 5 lojtarë të huaj, pa pasur edhe një bazë të fortë në ekip nga sezoni i kaluar dhe nga të rinjtë.
Në përgjithësi, ju cilat skuadra i shikoni më të organizuara në këtë periudhë përgatitore dhe merkatoje?
Duke i parë në tërësi të dhjetë skuadrat, shoh si skuadër më të organizuar në Kategorinë Superiore sot për sot, Kukësin, e më pas Teutën me Flamurtarin. Skënderbeu e ka boshtin, por ka luhatje psikologjike, ndërsa Partizani e Luftëtari ende nuk kanë treguar realitet pozitiv.
Në atmosferën e merkatos, nga 10 skuadrat, vetëm Tirana nuk e ka ndryshuar trajnerin në këtë sezon, është ky një tregues me pasoja negative për garën?
Kjo formë po bëhet e modës sezon pas sezoni, e për mendimin tim nuk është shenjë e mirë e profesionalizmit real, sepse nuk tregon respekt e vlerësim për punën e trajnerëve. Është e papëlqyeshme si formë, nga e cila unë nuk kuptoj se çfarë tregojnë, apo çfarë përfitojnë presidentët e klubeve.
Po rikthimi i “derbit” të kryeqytetit, Tirana-Partizani, si do të ndikojë në ecurinë dhe nivelin e garës së Superiores?
Për Superioren, “derbi” mes Tiranës e Partizanit, është një vlerë për Kategorinë Superiore. Tradicionalisht këto dy skuadra kanë dhënë ndeshje të mira dhe me shumë tifozë, por aktualiteti i tyre nuk është shumë optimist. Do uroja që, të paktën të sjellin më shumë tifozë në stadium.
Nëse do të kishit një horoskop (parashikim) për sezonin e ri, ku mendoni se duhet përqendruar më shumë gjatë garës?
Do të dëshiroja që në këtë sezon të ketë më shumë rivalitet mes të gjitha skuadrave, të kemi ndeshje Fair-play dhe me sa më shumë tifozë në stadiume. Drejtuesit e ekipeve duhet të jenë më të përgjegjshëm për garën, ndërsa FSHF-ja një drejtuese e monitoruese e saj.