Mike Tyson është një nga boksierët profesionistë më të mirë që ka njohur ndonjëherë bota.
Përveç karrierës së suksesshme në boks nga viti 1985 deri në 2005-n, Tyson njihet edhe për dashurinë e tij të veçantë për kafshët ekzotike, pasi ka pasur në pronësi shumë tigra.
Boksieri amerikan, i cili tashmë drejton një fermë kanabisi, kishte vendosur të blinte një tigër gjatë kohës që ishte në burg në vitin 1992.
Bëhet fjalë për tigreshën e bardhë të quajtur Kenia, e cila u shndërrua në një anëtar familje për 53-vjeçarin.
Ai e mbajti për 16 vjet Kenian, ndërsa së fundmi boksieri zbuloi arsyen që e detyroi të hiqte dorë nga kafsha ekzotike.
Në një intervistë për GQ Sports, Tyson u shpreh: “Kam pasur një tigër të përkedhelur, emri i saj ishte Kenia. Ajo ishte rreth 250 kg. Unë kisha një dashuri të madhe për të, kam fjetur me Kenian dhe e mbaja në dhomën time. Ajo qëndroi me mua për 16 vjet. Por pasi u plak, unë duhet të shpëtoja prej saj, pasi gjendja e saj filloi të përkeqësohej. Ajo sulmoi dikë, duke i shqyer krahun.”
Në karrierën e tij Mike Tyson ka zhvilluar 58 ndeshje boksi, 50 prej të cilave ka fituar, 6 sfida i ka humbur dhe dy barazime. 44 nga 50 ndeshjet e fituara, Tyson i ka arritur duke hedhur “knockout” kundërshtarët e tij.
