Ilir Lluri: Vlerat unikale të valleve shqiptare në një festival foklorik tipologjik

626
Për tri ditë me radhë në qendrën kulturore “Vaçe Zela” të qytetit të Lushnjës nga Qendra Kombëtare e Veprimtarive Folklorike në bashkëpunim me Bashkinë e qytetit është zhvilluar edicioni i VIII Festivalit Folklorik Tipologjik Kombëtar i Valles Popullore Burimore 2015. Sipas drejtores së Qendrës Kombëtare e Veprimtarive Folklorike Meri Kumbe: Ky festival organizohet në bazë qarqesh dhe nga çdo qark hyn në programin e konkurrimit një grup valleje popullore. “Në bazë të kritereve shkencore të miratura bashkërisht nga ana e qendrës sonë në bashkëpunim me Institutin e Antropologjisë Kulturore dhe Studimit të Artit dhe Ministrinë e Kulturës interpretimet duhet të jenë krejtësisht burimore dhe çdo interpretim i grupeve pjesëmarrëse nuk duhet të zgjasë më nga 20 min”, thotë drejtuesja e Qendrës Kombëtare e Veprimtarive Folklorike Znj. Meri Kumbe. Në dy edicionet e fundit Festivalit Folklorik Tipologjik Kombëtar i Valles Popullore Burimore është organizuar me nga 6 qarqe për çdo edicion, kështu vitin e kaluar kanë marrë pjesë 6 qarqe të vendit, ndërsa këtë vit marrin pjese dhe konkurrojnë 6 qarqet e tjera. 

Kjo ndarje sipas organizatorëve bëhet me qëllim përfaqësimin më të plotë dhe më me nivel të vlerave burimore të valleve. Në natën e parë të edicionit të VIII-të u përfshinë në konkurrim tre grupet folklorike të valles nga qarqet: Elbasan me 24 valltarë, Dibër me 25 artistë popullorë dhe qarku Lezhë me 25 valltarë. E veçanta e këtij festivali tipologjik është se pranohen të interpretojnë jashtë konkurrimit edhe shumë grupe valltarësh nga grupet folklorike, ansamblet dhe qendrat kulturore brenda vendit dhe nga trojet shqiptare jashtë vendit. Në natën e parë përshëndetën festivalin, grupi nga Tirana “Visaret e Krrabës” drejtuar nga folkloristi Ilir Selba, grupet e ftuara nga Maqedonia, grupi i valleve nga Çegran, grupi Shoqërisë Kulturore “Jahi Hasani” nga Gostivari. Në natën e dytë konkurruan grupet e valleve nga qarqet, Gjirokastër i përfaqësuar nga grupet e valleve të bashkisë Dropull dhe ai i valles labe nga Antigonea, Kukësi përfaqësuar nga grupi i valleve të Hasit dhe grupi i valleve i qarkut të Durrësit. Gjithashtu, në këtë natë përshëndetën festivalin grupet e ftuara nga Kosova, Gjilan dhe AKV “Agim Ramadani”.

 Sipas nënkryetarit të bashkisë së Lushnjës Gentian Nushi, përveç prezantimit dinjitoz të grupeve pjesëmarrëse dhe përshëndetëse, në risitë e këtij festivali për këtë edicion ishin organizimi i një atmosfere festive nga të gjithë pjesëmarrësit para fillimit të shfaqjeve në sheshin kryesor të qytetit. Grupi i përbashkët i organizimit u kujdes që artistët konkurrues dhe përshëndetës të ardhur nga të gjitha trevat e banuara nga shqiptarë brenda dhe jashtë vendit të komunikonin me banorët vendas dhe orët para fillimit të shfaqjeve u kthyen në festa të vërteta popullore. Po kështu nuk mungoi edhe valltari i vjetër pjesëmarrës i çmimit si valltari më i mirë në festivalin e Gjirokastrës 77- vjeçari, Shefqet Dervishi. Nga 

Grupi “Visaret e Krrabës” ra në sy interpretimi me mjeshtëri i dy motrave Kimete e Reride Saliu. Duhet theksuar se para fillimit të festivalit u organizua edhe një paradë e kostumeve popullore, ku artistët e ardhur performuan në pedonalen e qytetit të Lushnjës. Një vlerësim të lartë për mënyrën dhe cilësinë e këtij festivali tipologjik dha edhe kryetarja e jurisë “Mjeshtër i Madh” Liljana Cingu. “Ky festival tipologjik është një kontribut në ruajtjen dhe zhvillimin e valleve popullore burimore, është konceptuat dhe realizohet mbi disa kritere shkencore përcaktuese për ruajtjen dhe transmetim të pastër të këtyre vlerave’, u shpreh në përfundim të festivalit valltarja e njohur e Ansamblit të Këngëve dhe Valleve Liljana Cingu. Festivali u realizua me sukses nga ana e organizatore dhe pati një sallë të mbushur, me një pjesëmarrje maksimale të spektatorëve, dëshmi, e cila tregon se kjo veprimtari e përvitshme tashmë është bërë pjesë e rëndësishme e kalendarit kulturor të qytetit të Lushnjës.
Sigal