Sipas tabloidit amerikan TMZ, të martën në mëngjes, fqinjët zbuluan aktoren në oborr të veshur vetëm me një bluzë dhe duke bërtitur se nëna e saj ishte një shtrigë. Ajo përmendte në gjendje të pavetëdijshme fundin e botës si dhe qenin e saj që quhet Ziggy Stardust. Në vendngjarje mbërritën gjithashtu forcat policore dhe zjarrfikësit pasi të afërmit e 31-vjeçares i trembeshin një tentative vetëvrasjeje për shkak edhe të mbidozës që kishte marrë. Ky episod vjen pak ditë pasi Mischa i falenderoi të gjithë ata që e kishin uruar për ditëlindjen nëpërmjet një statusi në profilin e saj në Twitter. Megjithatë, disa momente më vonë ajo e fshiu statusin pa dhënë asnjë arsye. Duhet thënë se ky nuk është episodi i parë i këtij lloji i Barton. Në korrik të vitit 2009 ajo kërkoi suportin e një psikiatri pasi u diagnostikua me çrregullime të shëndetit mendor dhe si një rrezik për veten dhe të tjerët. Barton ka një histori konfliktesh edhe me të ëmën. Në vitin 2015, ajo e akuzoi për vjedhje dhe shfrytëzim të shtëpisë së Barton. “E ke kthyer shtëpinë time në një bankomat”, e akuzoi aktorja të ëmën asokohe.