Intervista/ Këngëtarja e mirënjohur Alida Hisku: Nuk po u besojmë syve dhe veshëve me ato që ndodhin në Shqipëri!
-Kushtetuta është busulla e çdo shoqërie demokratike, kush e shkel atë ka cenuar jetën e popullit
Situata të tilla nuk kanë ndodhur as në vitin ’1990!
– Në Gjermani as i shkon në mendje njeri të vjedhë apo të publikojë votën.
– Po ecet mbi hirin e një vullkani të padukshëm. O zot çfarë mund të sjellë kjo situatë!
– Nuk e kam ditur që kënga “Vajza Shqiptare” ishte kënga “Nënë Kosovare”.
Dhe pse ka mbi 30 vjet në Gjermani këngëtarja e mirënjohur Alida Hisku ndjek me vëmendje çdo zhvillim në Shqipëri. Ajo të tre fëmijët e saj i ka edukuar me një dashuri të rrallë për atdheun. Madje për vite të tëra ajo propagandon artistëve, të njohurve dhe miqve të saj që të vijnë në Shqipëri për t’i bërë pushimet. Janë me qindra turistë gjermanë që ajo ka sjellë në Shqipëri, falë dëshirës së saj, vullnetit, këmbënguljes për të propaganduar vlerat më të mira shqiptare. Por në këtë situatë ajo nuk mund të rrijë pa dhënë opinionin e saj. I qan zemra, pasi në momentin kur ajo me shumë të njohur po përgatitej për pushime në Shqipëri, situata tejet e acaruar politike e ka bërë që ta ndërpresë këtë nismë gjithëvjetore.
– Alida, ne flasim thuajse çdo ditë bashkë në Watsap disa herë. Jeton me situatën në atdhe po aq sa jetojmë dhe ne. Si e përjeton e si do ta cilësoje situatën aktuale në Shqipëri?
– Si do ta cilësoja ? Katastrofike! Të pabesueshme! Në kohën që është sezon plazhi, në kohën që turistët duhet të dyndeshin në Shqipëri, tashmë po ndodh ajo që nuk mund të mendohej as në vitin 1990. Në fund të këtij muaji ne ishim bërë rreth 100 turistë nga Gjermania për të bërë rreth 12 ditë pushime në Shqipëri, po si të vijmë? Ku të vijmë? Ato që po dëgjojmë janë të pabesueshme. Janë jashtë çdo logjike njerëzore. Cilët janë këta politikanë, xhanëm, që luajnë me fatet e një populli. A kanë ndjenja njerëzore? A kanë nëna, gra, motra, vëllezër, fëmijë? Ku po e çojnë Shqipërinë kështu, ku?! Shqipëria ka një Kushtetutë, ka një bibël orientuese. Aty janë të saktësuara të gjitha. Pra kur ka Kushtetutë nuk ka pse të flasë askush sipas qejfit. Atë Kushtetutë e ka miratuar populli dhe çdo njeri është i detyruar ta zbatojë. Kush mund të dalë mbi kushtetutën në një vend demokratik? Cilat janë arsyet që shkelet Kushtetuta? Vetëm tradhtarët mund të hedhin hapa që bien ndesh me të. Politikanët janë të përkohshëm, ndërsa Kushtetuta dhe Shqipëria të përjetshëm. Ato që shkruhen në Kushtetutë nuk ka të drejtë t’i keqinterpretojë asnjë politikan apo kushdo qoftë. Mund ta shkelë Merkeli Kushtetutën në Gjermani, edhe pse gjermanët i kanë dhënë besimin më të madh në gjysmë shekulli?! As i shkon në mend, madje e shikon Kushtetutën të njësuar me zotin. Që kur doli dita e zgjedhjeve politikanët duhej të uleshin, duhej të sheshonin çdo keqkuptim për interesat e kombit. Tani në qershor Shqipëria duhej të ishte mbushur me turistë, ndërsa në fakt është e mbushur me mitingje dhe anti-mitingje. Ku e çoni kështu Shqipërinë, more njerëz pa taban? Ku? Boll halle kanë shqiptarët dhe tani u duhet dhe konfrontimi i majtë e i djathtë. Qeveria në vend të punojë për mirëqenie merret me llafe bosh. Opozita duhet të jetë më e vetëpërmbajtur.
-Ju keni shumë vite që votoni në Gjermani si zhvillohen zgjedhjet aty?
Zgjedhjet këtu more zotëri janë ditë feste, ditë gëzimi. Njerëzit shkojnë në mënyrë të ndërgjegjshme dhe votojnë për të ardhmen e tyre. Vota është e fshehtë dhe as e mendon njeri të të bëjë presion që të votosh për këtë apo atë parti. As e mendon njeri të bësh publike votën. Vota është e fshehtë, është ëndrra jote në sirtar për të ardhmen e fëmijëve. Kush cenon votën, kush bën presion për votën ndëshkohet. Ligjet janë të ashpra. Ligjet janë njëlloj për të majtë dhe të djathtë. Qeveria e mbron më shumë se kushdo votën, se e ka detyrë. Nuk mund të mendohet këtu që një deputet të blejë votën apo një kriminel të bëjë presion që të votosh kundër dëshirës. As që mendohet. Policia është asnjanëse, ajo është e popullit për popullin. Policia nuk bën propagandë për votimet për asnjërën parti. Ajo ka detyrë të ruajë qetësinë. Situata, me sa shoh, ka shkuar në pikën kulmore të durimit. Kujdes, kujdes, një shkëndijë është e vogël por kur bie mbi një dinamit krijon një tragjeditë pamenduar. Ndaj them se është koha që politikanët pa mendjemadhësi, pa arrogancë, pa mllefe të ulen të gjejnë gjuhën e bashkimit dhe të mirëkuptimit. Kujdes, po ecet mbi hirin e një vullkani të padukshëm. O zot, çfarë mund të sjellë kjo situatë! Rrugët e zgjidhjes janë, mjafton dëshira e mirë.
Po Alida artiste a vazhdon të jetë angazhuar me koncertet me grupin “Melodi Rain”?
Sigurisht që vazhdojmë. Ne nuk ndalemi kurrë. Grupi “Melodi Rain” ka një natyrë specifike. Pra, një program muzikor dhe udhëtim nëpër botë. Është një grup, i cili tashmë ka formuar fytyrën e vet. Një grup që do ta vazhdoj rrugën e nisur duke e shtrirë veprimtarinë e aktiviteteve kudo ku ka emigrantë shqiptarë; si në Gjermani dhe kudo në Evropë. Fillimi duket i mbarë, Si nismëtare them se kemi ecur mirë. E kisha ëndërr një grup të tillë. Së fundi, ëndrra u bë realitet. Tashmë na duhet organizim dhe përkushtim për të ecur përpara. Them se asgjë nuk na ndalon, pasi në Gjermani arti, muzika vlerësohen dhe nxiten. Respektohen në maksimum, aq më tepër kur bëhet fjalë për emigrantët, pasi këtu duan që emigrantët të integrohen në jetën e vendasve.
-Po Alina vajza juaj a është pjesë e grupit?
Sigurisht, në promovimin e grupit tim kur dhashë edhe një koncert të madh në sallën e Kulturës së qytetit atje futa madje edhe Alinën të këndonte vetëm, por edhe bashkë me grupin. Besoj dhe dëshiroj që këtë grup ta vazhdojë ta mbajë gjallë Alina në të ardhmen me shoqet e saj. Alina, edhe pse ka lindur në Gjermani e do shumë çdo gjë shqiptare dhe nuk mund të rijë pa ardhur në Shqipëri.
– Albini, Djali juaj edhe ai ndjek traditën artistike të familjes, edhe pse në një zhanër tjetër, a ka bërë ndonjë film tjetër në Gjermani?
Albini gjithmonë thirret në role televizive, tashmë ka luajtur disa role. Gjithashtu krahas punës, më shoqëron edhe mua si menaxher në intervista e në koncerte. Mbetet një djalë i mbarë që e do atdheun e vet dhe pse u rrit në Gjermani.
E veçantë por e vërtetë. Sa herë vjen në Tiranë kur ecim bashkë rrugës ju putheni dhe përqafoheni me shumë njerëz apo artistë. Nga buron kjo dashuri?
Nga malli. Malli dhe miqësia e sinqertë. Në atë sistem ne vërtetë ishim të varfër, por kishim dashuri të madhe dhe shoqëri të sinqertë. Por në morinë e miqësive të mia do veçoja dy gra (atëherë ishin ende fëmijë) që dikur kanë qenë në Shtëpinë e Fëmijës, ato janë Elida Hasani dhe Amarilda Goseni. Me to jam njohur një ditë vjeshte mbas një koncerti në estradën e Tiranës, kur një grup i tyre kishte ardhur për të parë shfaqjen. Ka ndodhur para 34 vjetësh…..në mos gaboj, më 1984-n. Kjo ditë ka qenë tepër e dhimbshme dhe e veçantë, sepse nuk më kishte ndodhur që të kisha adhurues (fansa) kaq të vegjël dhe sidomos nga Shtëpia e Fëmijës. Ato vinin shpesh tek unë dhe u bënë pjesë e familjes sime. Nëna ime ishte vetë artiste dhe dinte mirë t’i trajtonte adhuruesit e muzikës. Ajo tashmë ishte e lumtur që familja e saj u zgjerua dhe krenohej për këtë kudo. Ajo i trajtonte sikur të ishin vajzat e saj. Ato vajza tek ne ngopeshin me dashurinë e nënës dhe timen, më shumë se me bukë. Ato ndjenin tek ne atë që mbase kurrë në jetën e tyre nuk e kishin ndjerë. E kjo i mjaftonte Elidës dhe Amarildës. Në atë kohë ato ishin në shkollën fillore, dhe unë u kam ndenjur pranë që ato t’u kushtonin vëmendje mësimeve së pari, si dhe edukimit moral, aty në shtëpinë e fëmijës. E tërë familja ime ndihmonte që të dyja të integroheshin me ambientin familjar si dhe të përgatiteshin që në të ardhmen të bëheshin nëna të denja në familjet e tyre. E vërtet, ato ashtu u bënë.
Po ju lexoj diçka që s’ju ka rënë në dorë nga një intervistë e imja me poetin progonatas Ibrahim Gani, dëgjojeni….(pjesë interviste me Ibrahim Ganin)…
-Atë kohë shumë krijime thuajse redaktoheshin fund e krye kur nuk kishin partishmëri, juve ju ka ndodhur një redaktim i tillë radikal?
Po më ka ndodhur, më ka ndodhur dhe jam gjendur në një situatë të vështirë. Në një nga koncertet e muajit Maj, të Dekadës 1980- ’90, së bashku me artistin dhe kompozitorin e shquar Avni Mula, unë-tekstin, ai-muzikën; paraqitëm motivin “Nënë Kosovare”.
I mirënjohuri Avni Mula, atë vit do të shkonte në Kosovë, më pati thënë se tekstin e kompozuar e kishte dhënë në institucionin përkatës.
Në vazhdim të koncerteve që transmetoheshin nga TVSH direkt nga Teatri Opera-Baletit, prezantuesja përmendi emrin e Avni Mulës dhe emrin tim. Për habinë time, të njerëzve, shokëve e miqve të mi, titulli dhe përmbajtja ishin ndryshuar. Nga “Nënë Kosovare” “kompetentët” e kishin “pagëzuar” “Vajza Shqiptare”. Nga teksti origjinal pothuajse s’kishte mbetur asgjë përveçse disa vargje të refrenit. Kënga u këndua nga këngëtarja zë ëmbël e atyre viteve Alida Hisku, që siç dihet mbas një denoncimi për përmbajtjen e fletëve të ditarit të saj, u syrgjynos në “gjirin e ngrohtë të klasës punëtore” dhe që më vonë u pasuan më ngjarje tepër të dhimbshme në jetën e saj familjare. Sqarimet që kërkova nga ish-shefi i kulturës në Komitetin Ekzekutiv të Tiranës, R. H ishin shumë “domethënëse” dhe shumë të “sinqerta”. Sipas tij, ishte më mirë t’i këndohej “Vajzës shqiptare” se sa “Nënës kosovare” që me siguri, sipas arsyetimit të tij, mund të ndizte një debat që mua mund të më kushtonte shtrenjtë, edhe për faktin se… “juve shoku Ibrahim nuk mund të botoni më asnjë shkrim në “Zërin e Popullit” dhe gjithashtu, “juve u është ndaluar pjesëmarrja në Festivalin Kombëtar të dhjetorit. Ju nuk duhet të harroni, – vazhdoi shefi – se shoku Ramiz Alia, në analizën që i bëri grupit puçist në mbledhjen e Drejtorisë Politike për ju është shprehur tekstualisht: ‘Ka tendenca mendjemadhësie edhe në këto sektorë.’
-Alida: (loton),…Më emocionove…E mbaj mend autorin si në ëndërr, por s’e dija gjithë këtë ngjarje. Sa mirë bëre që ma përcolle. Diçka që s’e mendoja kështu, madje as e dija fare të vërtetën. Këtë këngë e kam dashur shumë, shumë. Tani më bën të mendoj dhe ta dua më shumë. Sa mirë do të ishte të këndohej “Nënë Kosovare”. Një këngë për Kosovën martire do ishte një mrekulli atë kohë. Kjo jetë është e mbushur me befasi….Pra kënga “Vajza Shqiptare” ishte kënga “Nënë Kosovare”!