Dy britanikë 35 dhe 33 vjeç janë akuzuar për trafikim të paligjshëm të qenieve njerëzore, pasi një gomone me 18 shqiptarë mbi të u shpëtua pranë brigjeve të Kentit gjatë fundjavës. Akuza ndaj tyre është ngritur për shkelje të “Aktit të Emigracionit”, teksa janë mbajtur në paraburgim derisa dolën para gjykatës “Medway Magistrates” mëngjesin e kësaj të hëne.
Roja Bregdetare, Institucioni Mbretëror Kombëtar për Shpëtimin e mjeteve të lundrimit, si dhe dy anije të Forcës Kufitare u përfshinë në operacionin për shpëtimin e gomones, që u përball me vështirësi pranë brigjeve të Dymchurch natën e së shtunës. Dy trafikantët britanikë u shpëtuan së bashku me 18 emigrantët e paligjshëm shqiptarë, dhe së bashku iu dorëzuan oficerëve të Forcës Kufitare për t’u dërguar më pas në Dover e për t’u marrë në pyetje. Një gomone e ngjashme u zbulua më pas në plazhet e Dymchurchit. Nëse ka lidhje ngjarja e djeshme me këtë mjet, kjo ende nuk është konfirmuar, por kreu i Rojes Bregdetare franceze, Bernard Barron tha për “Sky News” se kalimi i ngushticës së La Manshit është tepër i rrezikshëm dhe i papërshtatshëm për të tilla mjete.