Rrugët nacionale dhe ato rurale, janë sektori më problematik të cilin udhëtarët, biznesi dhe qytetarët po vuajnë ashpërsisht me vonesa, lodhje, bllokime të veprimtarisë së biznesit e jetës së përditshme, aksidente dhe rrezikun e jetës gjatë udhëtimeve, si dhe shkatërrimin e automjeteve. Këtë situatë nuk e ka krijuar “Zoti”, as keqbërësit, as automjetet që kalojnë përditë në këto rrugë, por e kanë shkaktuar pazaret që vazhdon të bëjë prej 30 muajsh drejtori i rrugëve, tenderxhiu Dashamair Xhika, prej 1 muaj i futur prej drejtësisë nën hetim për aferat me tenderët, për planifikimin klientelistë të fondeve nëpër rajonet rrugore, për korrupsionin me investimet dhe projektet e munguara e të cënuara të sinjalistikës rrugore, për shkak të së cilës çdo ditë ndodhin aksidente e çdo muaj ndodhin 5-6 humbje jete nga këto aksidente, siç ndodhi 1 javë më parë aksidenti i rëndë në Gosë të Kavajës thjeshtë prej mungesës së plotë të sinjalistikës rrugore e mungesës së plotë të elementëve mbrojtës të rrugës. Alarmi i fundit për shkatërrim rruge nacionale vjen nga rrethi i Burrelit.
Është aksi nacional rrugor që lidh dy bashkitë Burrel e Klos, i cili prej afro 1 viti është tjetërsuar në gërmadhë, ku nuk mund të kalohet jo me normalisht, por as me vështirësi me mjete të rënda e të larta, mbasi aksi është “shkulur” plotësisht, duke mbetur pa asnjë centimetër asfalt. Banorët e zonës dhe drejtuesit e mjeteve, deklarojnë se kjo gjendje është bërë prezent në bashkitë Klos e Burrel, në prefekturë dhe në drejtorinë rajonale të rrugëve e po kështu janë dërguar mbi 300 letra ankimi në qeveri, por asnjë nuk ndërhyn për të rehabilituar rrugën. Në bashkitë Klos e Burrel, me të drejt thonë se nuk kanë as kompetencë e as fonde për të ndryshuar gjendjen, mbasi ky është kas rrugor kombëtar dhe për mirëmbajtjen, apo rehabilitimin e saj ka detyrim vetëm Drejtoria e Përgjithshme e Rrugëve. Sipas drejtuesve të bashkive Klos e Burrel, drejtorit të rrugëve dashamir xhika, prefekturës dhe qarkut i janë drejtuar disa kërkesa por prej tyre ka shpërfillje. Kërkesa për të ndërhyrë i janë bërë edhe qeverisë qendrore, por edhe rpej andej nuk ka asnjë reagim. Ndërkohë rruga Klos-Burrel e cila lidh jo vetëm dy bashkitë, por edhe krejt aksin Milot-peshkopi vazhdon të jetë e të lihet në gjende gërmadhë, përgjatë të cilës vazhdojnë e vuajnë prej afro 1 viti udhëtarët dhe drejtuesit e mjeteve, bizneset rajonale e ato të zonës Burrel-Peshkopi. Interesimit të gazetës “Telegraf” në drejtorinë e rrugëve, iu përgjigjën me një listë tenderësh që janë bërë e janë financuar për atë aks rrugor në 30 muajt e fundit, vlera e të cilëve ka shkuar në 500 milionë lekë për rikonstruksione, sinjalistikë e mirëmbajtje rutinë. Por rruga e financuar nga tenderët e firmosur prej Dashamir Xhikës është në gjendje të shkatërruar, tepër të mjeruar, madje e pa sigurt për shkak të mungesës së sinjalistikës dhe gjendjes fizike në krejt gjatësinë e saj. E ndërsa kjo rrugë vazhdon të jetë gërmadhë, drejtori Xhika bllokon fondet dhe bënë bilance… tenderësh! Pse? Fatkeqësisht, rrugët janë lënë në administrimin shtetëror të drejtuesi të paaftë e abuzues. Si të jetë në mallin e tij privat, drejtori i rrugëve Dashamir Xhika, ka bllokuar fondet që nevojiten për ndërhyrje urgjente në këtë rrugë e cila nuk është rasti parë q bllokohet, që shkatërrohet e që braktiset prej drejtorisë së komandon dhe shfrytëzon si pronë private tenderxhiu i babëzitur e i pandëshkuar, i penalizuari Dashamir Xhika. Pothuajse çdo vit, segmenti rrugor Burrel-Klos dëmtohet. Drejtuesit e mjeteve përballen çdo ditë me gropat e krijuara në rrugë, por drejtoria e rrugëve numëron tenderët që ka zhvilluar duke lënë rrugët në braktisje të plotë.
