Katania, prokuroria po heton persona të paidentifikuar

511
Konfirmohet vazhdimi i procesit për dosjen “Habilaj”, ndërsa aktet e hetimit mund t’u dërgohen për kompetencë autoriteteve shqiptare
Prokuroria e Katanias ka përfunduar të ashtuquajturat hetime paraprake për 15 të hetuar të grupit të drejtuar nga Moisi Habilaj dhe Antonino Riela. Por hetimet vazhdojnë për persona të tjerë, të paidentifikuar. Për këta 15 persona prokuroria u ka vënë në dispozicion avokatëve të tyre dokumentacionin e plotë të hetimit. Vinenza Pirracchio është avokate e të njëri prej të akuzuarve, Gianluca Passavantit. “Me mbylljen e hetimeve paraprake nuk do të thotë që nuk mund të zhvillohen me hetime. Ky moment shërben për mbrojtjen, e cila mund të marrë në zotërim të gjitha aktet, të hetuarit mund të kërkojnë dhe që të merren në pyetje nga Prokurori dhe të japin deklarimet e tyre. Me njohjen e akteve të hetimit të deritanishme, i jepet dhe mundësia për të zgjedhur strategjinë më të përshtatshme të mundshme. Ky vendim nënkupton vetëm këtë gjë. Nuk do të thotë që hetimet nuk vazhdojnë, sepse sigurisht që mund të vazhdojnë dhe nga elementet e mbledhura mund të hapen dhe pista të reja hetimi. Në këtë moment, avokatëve dhe të dyshuarve i vihen në dispozicion të gjitha dokumentet dhe më pas shihet strategjia që do ndiqet. Mund të kërkohet ballafaqimi, ose mund të kërkohet dhe që të gjykohet me aktet si janë, pra pa dëgjuar dëshmitarë në një proces publik dhe në këtë mënyrë i ulet 1/3 e dënimit”, tha për TCH Vincenza Pirracchio, avokate. Sipas dokumentit të prokurorisë së Catanias, që “Top Channel” e disponon, 4 të dyshuar, Nezar Seiti, Armando Sulaj, Sabaudin Çelaj dhe Florian Habilaj po hetohen të veçuar nga kjo dosje. Avokatja Pirracchio shpjegon arsyet. “Mund të jetë që prokurorët duke verifikuar dokumentet e deritanishëm, e kanë parë të paarsyeshme për t’i dërguar për gjykim këta persona. Por në këtë rast, kur po flasim për një organizatë dhe kur prokurorët mendojnë se ajo mund të jetë krijuar në një shtet tjetër dhe ai vend, vijon të mbajë qendrën e aktivitetit kriminal, autoritetet italiane mund edhe të kenë vendosur që, për sa i përket atyre pozicioneve, të dërgojë aktet e hetimit për kompetencë autoriteteve të vendit ku dyshohet se pjesa e parë e krimit është kryer”, tha Vincenza Pirracchio.

Pas përfundimit të afatit 20 ditor, pritet që Gjykata e Katanias të caktojë dhe datën e zhvillimit të seancës paraprake, ku do të vendoset nëse të gjithë të dyshuarit do të kalojnë në gjykim apo jo. Enigmë mbeten emrat që janë në fazë paraprake hetimi, që prokuroria e Katanias nuk i bën publike, ndërsa burime mediatike kanë bërë të ditur në Shqipëri se një procedim është hapur edhe ndaj ish-ministrit të Brendshëm, Saimir Tahiri. Ky procedim, sipas burimeve, ka nisur më 27 tetor 2017, vetëm 8 ditë pasi prokuroria kërkoi arrestimin e ish-ministrit të Brendshëm në Shqipëri. Kuvendi ia mohoi autorizimin organit të akuzës, duke kërkuar prova të mëtejshme. 
Sigal