Italia e sjell në Shqipëri, pastaj kërkon arrestimin si terrorist

475
Sigal

Pasi ishte deportuar në Shqipëri nga Italia, kanë qenë autoritetet e drejtësisë po italiane që kanë kërkuar arrestimin e Bledar Ibrahimit nga Elbasani.

Ai akuzohet si pjesëmarrës në organizata terroriste. Deportimi në Shqipëri ishte bërë pikërisht për akuzat si person me rrezikshmëri të lartë.

Por në muajin mars, Prokuroria e Romës ka kërkuar arrestimin e tij, për pjesëmarrje në organizata terroriste në Itali e Egjipt.

Njoftimi i Policisë së Shtetit:

Operacion për kapjen e personave me rrezikshmëri të lartë shoqërore,  të shpallur në kërkim ndërkombëtar. Operacioni nga Drejtoria e Antiterrorit në bashkëpunim me Interpol Tirana dhe DVP Elbasan

Kapet dhe arrestohet me qëllim ekstradimi, një 28 – vjeçar i kërkuar nga Drejtësia Italiane.

Në vijim të punës për parandalimin e terrorizmit, si dhe për kapjen e personave të shpallur në kërkim ndërkombëtar për terrorizëm, strukturat e Drejtorisë së Antiterrorit në Policinë e Shtetit, si rezultat i informacioneve të marra dhe punës investigative, organizuan dhe finalizuan në bashkëpunim me Interpol Tirana dhe Drejtorinë Vendore të Policisë Elbasan, operacionin për kapjen e një personi me rrezikshmëri të lartë shoqërore.

Si rezultat i operacionit, nga agjentët e Antiterrorit u bë e mundur kapja dhe arrestimi me qëllim ekstradimin e shtetasit shqiptar B. I., 28 vjeç, banues në Elbasan.

Arrestimi i këtij shtetasi u bë për arsye se Interpol Roma në datë 15.04.2019 e ka shpallur në kërkim ndërkombëtar, mbi bazën e vendimit të arrestit të lëshuar nga Prokuroria e Republikës Italiane në mars 2019, për veprën penale ‘Pjesëmarrje në organizatë terroriste, parashikuar nga neni 270 i Kodit Penal italian.

Ky person më parë është deportuar nga Italia si person i rrezikshëm për rendin dhe sigurinë publike në Itali, pasi dyshohet të jetë i përfshirë me organizata terroriste në Itali dhe Egjipt.

Materialet në ngarkim të këtij shtetasi, i kaluan Prokurorisë për veprime të mëtejshme.