Një ditë pas grabitjes spektakolare në aeroportin e Rinasit, policia e Durrësit dhe e Tiranës, ka shoqëruar 20 punonjës të firmës private si dhe titullarët e kompanive “Nazeri 2000” dhe “Jaguar”.
Kompania e parë ishte e licencuar të shoqëronte paratë në avionin që do të fluturonte drejt Vjenës, ndërsa e dyta ka qenë pranë vendngjarjes për llogari të një banke tjetër. Por sipas burimeve, ajo nuk ka ndëhyrë kur ka parë grabitjen e parave.
Nga dëshmitë e para të rojeve private, mësohet se këta të fundit janë mbrojtur duke thënë se paratë janë grabitur jashtë juridiksionit të tyre. “Ne i kemi lënë paratë deri në doganë. Autoritetet e aeroportit merren me kontrollin”.
Burime nga policia, bëjnë me dije se ata kanë shpjeguar se në pistën e avionëve ku prisnin të ngarkonin paratë ishin të pa armatosur pas, nuk u lejohet të hyjnë me armë.
“Nuk kishim mundësi të reagonim, personat ishin të armatosur. Nuk e dimë shumën e parave që po transportonim” mësohet të kenë deklaruar ata.
Veç kësaj, policia dyshon se rojet private mund të kenë bashkëpunuar me grabitësit. Madje ata akuzohen se kanë shkelur rregullat e sigurisë, pasi në vend që të ishin 7 persona që do të ruanin gjatë kohës së transferimit të parave, ishin vetëm 3. “Nuk jemi njoftuar menjëherë nga firma private”, ka deklaruar policia.
Ndërkohë, burime të policisë, bëjnë me dije se grabitësit dyshohet të jenë larguar në Malësinë e Niklës në Krujë.
Tre persona të armatosur kanë mundur të hyjnë dje në aeroportin e Rinasit duke grabitur një sasi të madhe parash. Forcat e policisë vijojnë punën për identifikimin dhe kapjen e tyre.
