EMRAT/ U kapën me kokainë në Itali, dënohen me 7 vjet e 4 muaj burg tre shqiptarët dhe greku

1024
Sigal

Shtatë vite e 4 muaj burg për tre shqiptarët, Ndriçim Bejko, 35 vjeç, rezident në Anagni, Gerti Zyberi, 30 vjeç, me banim në rrugën “Gaeta” në Frosinone, Kostandin Sulonjaku, 33 vjeç, edhe ai i vendosur në Frosinone dhe grekun Vangel Tsoulli, 63 vjeç. Dje seanca me gjykim të shkurtuar për katër të arrestuarit në nëntorin e vitit të kaluar në operacionin “Borë ballkanike”.

Akuza për ta është trafik me qëllim shpërndarjen e lëndëve narkotike. Tre shqiptarët u mbrojtën nga avokati Marco Maietta, ndërsa greku nga avokati Giampiero Vellucci. Të arrestuarit rrezikonin deri në 20 vite burg, ndërsa prokurori kishte kërkuar 12 vite.

Katër personat u arrestuar më 11 nëntor të vitit 2017. Pakot me kokainë u gjetën në një ndarje të fshehtë në brendësi të fenerit të makinës që ishte parkuar në rrugën “Gaeta”.

Njëmbëdhjetë zarfe me një peshë totale prej 11 kg. Policia dhe Guardia di Finanza së bashku, arritën të zbulonin drogën pas lëvizjeve të çuditshme në anën e pasme të “Volkswagen Tiguan”, me targa greke.

Në operacion morën pjesë rreth dyzet efektivë, më shumë se pesë orë ndjekje. U bllokuan të gjitha rrugët aty pranë, por hetimi kishte filluar pas një sërë kontrollesh rreth stacionit hekurudhor të Frosinones.